Shkon në tre numbi i viktimave të aksidentit tragjik që ndodhi pasditen e kësaj të enjte te mbikalimi i TEG-ut.
Burime për Syri Tv bëjnë të ditur se ka ndërruar jetë edhe drejtuesi i "Audi"-t, Klevis Ruçaj, 20 vjeç. Ai iu nënshtrua një ndërhyrje kirurgjikale te Spitali i Traumës, por për shkak të plagëve të rënda nuk ka mundur të mbijetojë.
Ai po udhëtonte bashkë me dy vajza, të cilat ndërruan jetë në vendin e ngjarjes, por identifikimi i tyre ka qenë i pamundur.
Automjeti ku ato udhëtonin doli nga rruga te mbikalimi i TEG-ut dhe pasi theu barrierat metalike, ra në rrugën nacionale Elbasan-Tiranë, mbi kofanon e një makine "Honda", ku udhëtonte një familje.
Tre personat që udhëtonin me "Honda"-n mbetën të plagosur.
Te Spitali i Traumës po trajtohen Qemal Kurti 60 vjeç, Aida Kurti 50 vjeç si dhe O.K, 24 vjeç.
Shkak për aksidentin paraprakisht dyshohet shpejtësia e lartë e automjetit tip "Audi" i cili udhëtonte nga autostrada e Farkës në drejtim të rrethrrotullimit të TEG-ut.
Tiranë/Informacion shtesë
Në vijim të aksidentit të dhënë më parë, të ndodhur në afërsi të rrethrrotullimit të TEG-ut, ku humbën jetën dy shtetase, ju informojmë se:
Si pasojë e dëmtimeve të marra ka ndërruar jetë në spital shtetasi K. R., 20 vjeç, drejtuesi i automjetit tip "Audi".
© SYRI.net