Një aksident rrugor para dy ditësh në Itali përfundoi në tragjedi për një familje shqiptare në Piza, me humbjen e jetës së fëmijës që mbushte dy muaj nga lindja. Aksidenti përfshiu të paktën tri makina, midis të cilave edhe ajo e familjes shqiptare. Sipas një rindërtimi të ngjarjes nga policia, fëmija i vogël mori dëmtime të rënda nga hapja e airbag-ut pas përplasjes. Në momentin e goditjes, fëmija ishte vendosur në vendin e posaçëm për bebe, por në sediljen e përparme të pasagjerit, ndërsa nëna me djalin tjetër ishin ulur prapa, ndërkohë që babai ishte në timon.

Makina e familjes me origjinë shqiptare, por për disa vite banuese në San Giuliano Terme, në provincën e Pizës, kishte mbërritur në kryqëzimin përmes Manghi, një rrugë me katër korsi, pasditen e shkuar. Këtu ndodhi aksidenti ku u përplasën tre makina, përfshirë edhe atë të familjes shqiptare.

Përplasja, e cila nuk do të ishte veçanërisht e dhunshme, megjithatë aktivizoi sistemin e sigurisë duke hapur “airbag-un”. Kjo bëri që foshnja të kishte dëmtime të rënda në kokë, duke humbur menjëherë vetëdijen dhe duke mos dhënë shenja jete.

Mjekët e urgjencës u thirrën menjëherë në vendngjarje duke transportuar menjë-herë në spital foshnjën. Gjendja e fëmijës, i cili u paraqit me një traumë kraharori dhe një dëmtim të kokës, për mjekët menjëherë dukej shumë e rëndë. Fëmija, në fakt, iu nënshtrua gjithashtu operacionit, por pavarësisht përpjekjes, gjithçka rezultoi fatale.

Ndërkohë, disa orë pas vdekjes së fëmijës, prindërit janë nën hetim nën akuzën e vrasjes. Akuza paraprake e kontestuar nga prokurori zëvendësues Giancarlo Dominiani është ajo e vrasjes së thjeshtë, por nuk mund të përjashtohet që, gjatë hetimeve, mund të ndryshohet në vrasje.