Të reja të tjera janë mësuar lidhur me tragjedinë që goditi familjen Gjokola në Librazhd mbrëmjën e kaluar, teksa grupi i hetimit është duke punuar për të mësuar se cili qe shkaku që Daut Gjokola goditi me thikë gruan e tij Lule dhe pastaj vrau edhe veten.
Dyert e mortit janë hapur në familjen Gjokola në Librazhd, pas krimit makabër që tronditi gjithë Librazhdin mbrëmjen e së premtes, 6 shtator 2019.
Gazetari Migen Sejdini tregon se djali 26-vjeçar vijon ende të jetë në trauma psikologjike nga humbja e jetës së dy prindërve të tij, në rrethana tejet të rënda dhe për motive ende të pasqaruara totalisht.
Të kontaktuar nga SYRI TV, banorët e lagjes ku ndodhi krimi i dyfishtë hezitojnë të flasin, ndërsa jashtë kamerave nuk e kanë fshehur habinë.
Ata deklarojnë se Daut dhe Lule Gjokola njiheshin si një nga çiftet më të qetë në zonë e një nga familjet më të mira.
Të tjera detaje zbardhen nga ngjarja, teksa mësohet se çifti Gjokola është parë nga fqinjët teksa ngjitej me ashensor për në apartament, në katin e 4-t të pallatit në lagjen “Shkumbin”, pas xhiros së mbrëmjes.
Burime të Policisë bëjnë me dije se çifti dyshohet se ka debatuar për çështje xhelozie dhe situata ka precipituar. Daut Gjokola e ka qëlluar plot 15 herë me thikë bashkëshorten e tij 49-vjeçare. Britmat janë dëgjuar nga fqinjët, ndërsa në apartament nuk ndodhej asnjë nga fëmijët.
Djali 26-vjeçar i çiftit ndodhej në lokalin poshtë pallatit, prej nga do të mësonte çfarë kishte ndodhur vetëm pasi do të shihte sesi babai i tij u hodh nga ballkoni i shtëpisë, duke humbur jetën.
As nëna e tij, Lule Gjokola, nuk arriti t’i mbijetonte plageve te marra, duke ndërruar jetë pasi u transportua në spital. Ndërkohë në momentin e ngjarjes, vajza e familjes ndodhej në Tiranë.
Burime të Policisë sqarojnë për SYRI TV se djali nuk është mundur të merret në pyetje deri në mesditë, si pasojë e gjendjes së rënduar psikologjike. Çifti kishte në pronësi dy biznese, një pikë këmbimi valutor dhe një agjenci turistike.
© SYRI.net