Shtetet e Bashkuara, të cilat luajtën një rol të madh në përfundimin e përplasjeve kufitare vitin e kaluar midis Tajlandës dhe Kamboxhias, do të ofrojnë 45 milionë dollarë (38 milionë euro) në paketa ndihme për dy vendet e Azisë Juglindore, për të ndihmuar në sigurimin e stabilitetit dhe prosperitetit rajonal, tha të premten një zyrtar i lartë i Departamentit të Shtetit të SHBA-së.

Ndihmës Sekretari i Shtetit i SHBA-së për Çështjet e Azisë Lindore dhe Paqësorit, Michael DeSombre, e bëri njoftimin në një konferencë për mediat online në Bangkok, ku po takohej me zyrtarë të lartë tajlandezë për të diskutuar zbatimin e armëpushimit të tetorit të kaluar, i njohur edhe si Marrëveshja e Paqes e Kuala Lumpurit.

“Rivendosja e paqes në kufirin tajlandezo-kamboxhian hap mundësi të reja për Shtetet e Bashkuara për të thelluar punën tonë me të dy vendet për të promovuar stabilitetin rajonal, dhe për të çuar përpara interesat tona në një Indo-Paqësor më të sigurt, më të fortë dhe më të begatë”, tha DeSombre.

Të shtunën, ai ka planifikuar të zhvillojë diskutime me zyrtarë të lartë nga Kamboxhia në kryeqytetin e vendit, Phnom Penh.

Shtetet e Bashkuara "do të sigurojnë 15 milionë dollarë (12 milionë euro) për stabilizimin e kufijve për të ndihmuar komunitetet të rimëkëmben dhe për të mbështetur personat e zhvendosur; 10 milionë dollarë (8 milionë euro) për operacione çminimi dhe pastrimi të municioneve të pashpërthyera; dhe 20 milionë dollarë (17 milionë euro) për iniciativa që do të ndihmojnë të dy vendet të luftojnë operacionet mashtruese dhe trafikimin e drogës, ndër shumë programe të tjera", tha DeSombre.

Detajet e paketave të ndihmës janë ende në diskutim, tha ai.

Kina tha se ka siguruar rreth 2.8 milionë dollarë (2.4 milionë euro) ndihmë humanitare emergjente për të ndihmuar kamboxhianët e zhvendosur nga luftimet.

Kryeministri tajlandez, Anutin Charnvirakul tha se Pekini i bëri të njëjtën ofertë ndihme Tajlandës dhe se qeveria e tij po e shqyrtonte këtë mundësi.

Konkurrenca për ndikim

Shtetet e Bashkuara dhe Kina kanë konkurruar për ndikim në Azinë Juglindore për të paktën një dekadë. Kamboxhia është një aleate e ngushtë e Pekinit, dhe ndërsa Tajlanda ka lidhje të gjata dhe të ngushta me Uashingtonin, ato shihen gjerësisht si të dobësuara vitet e fundit.

Pretendimet rivale të gjata për territor përgjatë kufirit tajlando-kamboxhian, ishin shkaku rrënjësor i luftimeve.

Luftimet në korrik dhe dhjetor zhvendosën qindra mijëra njerëz në Tajlandë dhe Kamboxhia dhe vranë rreth 100 ushtarë dhe civilë.

Minat tokësore të mbetura nga dekada të tëra lufte civile në Kamboxhia janë një problem i vazhdueshëm, ndërsa Tailanda pretendon se minat e vendosura rishtazi në zonat kufitare, ishin përgjegjëse për plagosjen e ushtarëve të saj patrullues, në rreth një duzinë incidentesh vitin e kaluar.

Mashtrimet online me origjinë nga Azia Juglindore, veçanërisht nga Kamboxhia dhe Mianmari, janë një problem i madh i krimit transnacional, që ka parë miliarda dollarë të vjedhura nga viktimat në të gjithë botën.

Ndihma e SHBA-së për vendet e Azisë Juglindore dhe pjesë të tjera të botës për programe humanitare dhe zhvillimore, u shkurtua ndjeshëm vitin e kaluar kur administrata Trump mbylli Agjencinë Amerikane për Zhvillim Ndërkombëtar (USAID).

Kamboxhia dhe Tailanda fillimisht u përleshën për pesë ditë në fund të korrikut, përpara se të binin dakord për një armëpushim paraprak.

Kryeministri malajzian Anwar Ibrahim në atë kohë kërkoi një armëpushim pa kushte, por pati pak përparim, derisa ndërhyri Presidenti i SHBA-së Donald Trump.

Trump tha se i paralajmëroi udhëheqësit tajlandezë dhe kamboxhianë, se Uashingtoni nuk do të ecte përpara me marrëveshjet tregtare nëse armiqësitë vazhdonin.

Armëpushimi u formalizua në më shumë detaje në tetor, në një takim rajonal në Malajzi ku mori pjesë edhe Trump.

Luftime të reja shpërthyen në fillim të muajit të kaluar, por ministrat e mbrojtjes të Tajlandës dhe Kamboxhias nënshkruan një pakt të ri më 27 dhjetor, duke u zotuar të zbatojnë marrëveshjen e tetorit.

"Ne jemi shumë të përqendruar në ndjekjen e paqes në dhe përreth botës", u tha DeSombre gazetarëve.

"Presidenti Trump është një president i paqes dhe vërtet beson se paqja është thelbësore për rritjen ekonomike dhe prosperitetin."/ Euronews.