Në vitin 2022, Portugalia eksportoi 9 ton kanabis, por vetëm 14 kg u shitën brenda kufijve të saj. Pacientët ende i drejtohen tregut të zi, megjithëse mbjellja është e ligjshme në vend

Kur Paula Motta zbuloi kanabisin mjekësor në vitin 2017, ai ishte ende i paligjshëm në Portugali.

Vajza e saj 10-vjeçare vuante nga kriza epileptike deri në katër herë në ditë - disa zgjasnin 20 minuta - ndërsa 16 pilulat e përditshme që ajo merrte ishin të paefektshme kundër sindromës së saj Dravet.

Motta vendosi t'i jepte vajzës së saj disa pika ekstrakt kanabisi dhe me kalimin e kohës, krizat e vajzës u bënë më të pakta.

Adoleshentja vazhdon të marrë dy pilula së bashku me dy pika kanabis - një në mëngjes dhe një në mbrëmje - dhe krizat ndodhin vetëm "çdo pesëmbëdhjetë ditë për rreth dy minuta".

"Kanabisi mjekësor ia ndryshoi jetën," tha Motta, duke folur për Euroneës Health në shtëpinë e saj në Porto.

Kanabisi mjekësor u miratua në 2018 dhe u rregullua me ligj në 2019 në Portugali - vendi i parë në botë që çkriminalizoi përdorimin mjekësor të të gjitha drogave në vitin 2001. Ilaçet, preparatet dhe substancat e bazuara në bimën e kanabisit për "qëllime mjekësore" janë të ligjshme.

Motta - e cila është bashkëthemeluesja e "Nënave për Kanabisin", një shoqatë e krijuar për të udhëhequr prindërit e fëmijëve me sëmundje të pashërueshme - vazhdon të jetë në shkelje të ligjit sot: forma e kanabisit që ajo i jep vajzës së saj nuk është e ligjshme në Portugali..

Ndërsa dhjetëra kompani farmaceutike dhe bujqësore u dyndën në vend pas legalizimit të kanabisit mjekësor, ai mbetet jashtëzakonisht i kufizuar për pacientët portugez.

Shiten vetem 17 kg

I vetmi produkt që shitet aktualisht në Portugali është lulja e kanabisit e prodhuesit kanadez Tilray, me 18 për qind THC - përbërësi kryesor psikoaktiv i bimës.

Pacientët mund ta tymosin sythin ose ta ngrohin atë me një makinë dhe të thithin avullin.

Një kuti prej 15 g kushton 150 euro - shumë më tepër se tarifat e tregut të zi - dhe nuk rimbursohet nga sigurimet shëndetësore. Për më tepër, lulja mund t'u jepet me recetë  vetëm pacientëve që vuajnë nga shtatë gjendje specifike, për të cilët të gjitha opsionet e tjera "kimike" kanë qenë të pafrytshme.

Produkti nuk disponohet nga tre furnizuesit më të mëdhenj farmaceutikë të vendit dhe në vitin 2023 u shitën pak më shumë se një mijë kuti Tilray, ekuivalenti i 17 kg.

Në të njëjtin vit, 11 ton kanabis mjekësor u eksportuan nga Portugalia nga rreth 40 kompani të krijuara në vend, duke përfshirë Somai Pharmaceuticals.