Ish-presidenti Donald Trump nuk shkoi në gjykatë për të marrë pjesë në funeralin e vjehrrës së tij, Amalija Knavs, që u mbajt në Kishën Episkopale të Bethesda-by-the-Sea në Palm Beach, ku ai dhe Melania u martuan në vitin 2005. Në ceremoninë private ishin të pranishëm Trump, Melania dhe djali i tyre Barron, të cilët u ulën në rreshtin e parë, shkruan The Telegraph.

Amalija Knavs, një punëtore sllovene tekstilesh, ndërroi jetë më 9 janar dhe Trump e vlerësoi për kontributin që kishte dhënë për gjatësinë mbresëlënëse të Barronit prej 2 metrash falë gatimeve të saj.

Melania mbajti një eulogji emocionale në funeral, duke lavdëruar gatimet e nënës së saj dhe duke theksuar lidhjen midis Amalijas dhe Barronit. Ajo përshkroi përkushtimin e palëkundur të Amalijas, duke treguar se si e la atdheun e saj për të qenë me nipin e saj të porsalindur në Shtetet e Bashkuara. Ish-Zonja e Parë gjithashtu theksoi krenarinë e Amalijas pasi Trump u bë president dhe Melania shërbeu si Zonjë e Parë.

Në ceremoninë e varrimit morën pjesë anëtarë të tjerë të familjes Trump, duke përfshirë Tiffany-n dhe Ivankën.

Ish-presidenti, i njohur për prezencën e tij aktive në rrjetet sociale, në rrjetin e tij social “Truth Social” njoftoi se do t’i rikthehej fushatës të premten, duke deklaruar se e enjtja do t’i kushtohej ceremonisë së varrimit të një “gruaje të madhe, nënës së shtrenjtë të Melanias dhe gjyshes së Barronit."

Trump pritej në gjykatë në Nju Jork për çështjen e tij civile për shpifje të ngritur nga E. Jean Carroll. Megjithatë, ai kritikoi gjyqtarin, Lewis Kaplan, për refuzimin e shtyrjes së seancës për ta lejuar atë të marrë pjesë në funeralin e Amalija Knavsit.

Ish-presidenti kishte fluturuar në Florida pasi mbajti një tubim fushate në New Hampshire dhe shprehu synimin e tij për të rifilluar fushatën një ditë pas funeralit.

Ceremonia e varrimit shënoi një moment personal për familjen Trump, ku Melania shprehu mirënjohjen për ndikimin e nënës së saj dhe e përshkroi atë si një thesar të pazëvendësueshëm./SYRI.NET