Policia kanadeze njofton se në një shkollë hebraike në Montreal është qëlluar me armë zjarri, rasti i tretë në më pak se një javë, që një shkollë hebraike në qytet është sulmuar.

Për fat të mirë, nuk ka asnjë të lënduar, por fasada e shkollës është dëmtuar, raporton Reuters.

Të enjten, më 9 nëntor, dy shkolla të tjera hebraike në Montreal raportuan se kishin gjetur vrima plumbash në dyert e tyre të përparme. Nuk dihet nëse incidentet kanë lidhje.

Një anëtar i Këshillit të Hebrenjve Hasidikë të Quebec, Mayer Feig, thotë se të shtënat në shkolla kanë për qëllim të frikësojnë popullatën hebreje.

Policia e Torontos tha më parë se në tre javët e fundit, krimet e urrejtjes kundër hebrenjve dhe myslimanëve janë dyfishuar në krahasim me të gjithë vitin 2022.