Nga James Gregory/ BBC News.
Arrestimet për akuza korrupsioni në Parlamentin Evropian janë “shumë, shumë shqetësuese”, ka deklaruar shefi i politikës së jashtme të Bashkimit Evropian, Josep Borrell.
Ndërsa Ministri i Jashtëm irlandez Simon Coveney tha se akuzat kundër katër personave janë “tepër të dëmshme”.
Midis të arrestuarve ishte zëvendëspresidentja e Parlamentit Evropian Eva Kaili.
Prokurorët dyshojnë se një shtet i Gjirit Persik – besohet se Katari – është përpjekur të influencojë parlamentin përmes parave apo dhuratave.
Katar e ka mohuar një veprim të tillë.
Policia belge sekuestroi rreth 600 mijë euro në 16 kontrolle në Bruksel të premten. U sekuestruan edhe kompjuterë e celularë për të kontrolluar përmbajtjen e tyre.
Katër persona janë paditur, ndërsa dy të tjerë janë liruar, thanë prokurorët të dielën.
Deri tani nuk është dhënë emri i asnjë prej të dyshuarve, por mësohet se Kaili është midis të akuzuarve.
“Ata janë akuzuar për pjesëmarrje në organizatë kriminale, pastrim parash dhe korrupsion”, tha në një deklaratë zyra e prokurorit federal të Belgjikës.
Kaili – eurodeputete prej tetë vitesh – u pezullua nga funksionet si një prej 14 zëvendëspresidentëve nga presidentja e Parlamentit Evropian, Roberta Metsola.
Ajo është pezulluar edhe nga grupet Socialiste e Demokrate në parlament, si dhe nga partia e qendrës së majtë greke, PASOK.
Thuhet se prokurorët grekë i kanë ngrirë të gjitha pasuritë.
Shoqata Watchdog dhe eurodeputetë të opozitës thanë se hetim për ryshfete mund të përfaqësojë një nga skandalet më të mëdhenj të korrupsionit në historinë e Parlamentit Evropian.
“Sigurisht që ky lajm është shumë, shumë shqetësues”, tha Borrell për gazetarët sot, teksa mbërriti në mbledhjen e ministrave të jashtëm të BE.
“Po përballemi me disa ngjarje, disa fakte, që sigurisht që më shqetësojnë si ish-president i Parlamentit Evropian”.
Ai tha se hetimi nuk ka si objektiv asnjë nga shërbimi diplomatik i BE.
Ndërsa Terry Reintke, bashkëkryetare e bllokut të të gjelbërve në parlament, bëri thirrje për dorëheqje të menjëhershme të Kailit.
“Ne as nuk duhet të merremi me shkarkimin e saj nga posti i zëvendëspresidentes”, tha eurodeputetja gjermane. “Ajo duhet ta bëjë vetë”.
Prokurorët dyshojnë se një shtet i Gjiri është përpjekur të influencojë vendimet politike e ekonomike të parlamentit për disa muaj. Media lokale ka përmendur Katarin, por qeveria katariote tha se çdo pretendim për sjellje të gabuar është “i keqinformuar rëndë”.
Përgjegjësitë e Kailit si zëvendëspresidente përfshijnë Lindjen e Mesme. Në të kaluarën, ajo ka qenë mbrojtëse e Katarit.
Metsola fluturoi nga vendi i saj, Malta, për në Bruksel të shtunën në mbrëmje, për të qenë dëshmitare gjatë kontrollit të shtëpisë së një eurodeputeti, siç e kërkon kushtetuta belge.
Zëdhënësi i saj tha se Parlamenti Evropian “qëndron i vendosur kundër korrupsionit” dhe “po bashkëpunon plotësisht” me hetuesit.
Parlamenti Evropian është institucioni i vetëm i BE i zgjedhur direkt. 705 eurodeputetë zgjidhen nga votuesit në 27 vendet anëtare dhe mblidhen për shqyrtimin e paketave ligjore të propozuara dhe votojnë sipas ligjeve evropiane./BBC/
© SYRI.net