Prokurori i përgjithshëm në kryeqytetin e Jordanisë, Amman, ka ndaluar botimin e çdo informacioni në lidhje me një komplot të pretenduar që thuhet se përfshin vëllanë e mbretit, Princin Hamzah, tha televizioni shtetëror.

"Në mënyrë që të mbajë të fshehtë hetimin ndaj Princit Hamzah dhe të tjerëve, [është vendosur] të ndalohet botimi i gjithçkaje që lidhet me këtë hetim në këtë fazë," tha prokurori Hassan al-Abdallat.

"Ndalimi i botimit përfshin të gjitha mediat audiovizive dhe rrjetet sociale, si dhe publikimin e të gjitha imazheve ose videoklipeve që lidhen me këtë temë", tha ai në një deklaratë  në televizion.

Urdhri erdhi pasi Hamzah, vëllai nga njeri prind i mbretit, i cili ka qenë shumë kritik ndaj qeverisë, premtoi besnikëri ndaj Mbretit Abdullah II të hënën vonë, dy ditë pasi u vendos në arrest shtëpiak.

Qeveria e ka akuzuar Hamzah, një ish-princ i kurorës, për një komplot "të lig" dhe përfshirjen në një komplot për të "destabilizuar sigurinë e mbretërisë".

Hamzah - i cili tha se ishte vendosur në arrest shtëpiak, ndërsa të paktën 16 të tjerë u arrestuan - kishte marrë të hënën një ton sfidues, duke këmbëngulur se ai nuk do t'u bindej urdhrave që kufizonin lëvizjen e tij.

Por me një zbutje të dukshme të tensioneve, princi 41-vjeçar më vonë u zotua se do të mbështetej tek mbreti Abdullah.

"Unë do të qëndroj… besnik ndaj trashëgimisë së paraardhësve të mi, duke ecur në rrugën e tyre, besnik ndaj vijës dhe mesazhit të tyre dhe madhërisë së Tij," tha ai në një letër të nënshkruar, cituar nga pallati.

"Unë gjithmonë do të jem i gatshëm të ndihmoj dhe mbështes Madhërinë e Tij Mbretin dhe Princin e tij të Kurorës", citohet të ketë shkruar ai.

Hamzah - të cilit Abdullah i hoqi titullin princ i kurorës në 2004 - është shfaqur si një kritik i fortë duke akuzuar udhëheqjen e Jordanisë për korrupsion, nepotizëm dhe sundim autoritar.

Në një video që ai i dërgoi BBC të shtunën, ai nxiti "paaftësinë që ka mbizotëruar në strukturën tonë qeverisëse për 15-20 vitet e fundit dhe që është përkeqësuar".

"Askush nuk është në gjendje të flasë ose të shprehë mendim për diçka pa u sulmuar, arrestuar dhe kërcënuar," tha ai.