Të gjitha zhvillimet e fundit nga lufta e Hamasit në Izrael.

Presidenti i SHBA Joe Biden dhe udhëheqës nga vende të ndryshme lëshuan një deklaratë të përbashkët duke i kërkuar Hamasit që të lirojë pengjet në Gaza, duke intensifikuar presionin publik për të çuar përpara negociatat për një armëpushim të mundshëm me Izraelin.

Zyrtarët amerikanë pretendojnë se ka "një marrëveshje në tryezë që do të sillte një armëpushim menjëherë në Gaza, por Hamasi e ka refuzuar atë".

Deklarata është lëshuar nga Biden dhe liderët e 17 vendeve të tjera, ku të gjitha kanë qytetarë që janë zhdukur ose janë marrë peng gjatë sulmit të 7 tetorit ndaj Izraelit nga Hamasi.

Menjëherë pas kësaj, të afërmit e disa prej pengjeve, ndërsa mblidheshin në Tel Aviv, thirrën vendet e tjera të botës për t'u bashkuar me të 18-tët. Por familjet thanë gjithashtu se është koha të kalohet nga fjalët në veprime.

Vendet e tjera janë Argjentina, Austria, Brazili, Bullgaria, Kanadaja, Kolumbia, Danimarka, Franca, Gjermania, Hungaria, Polonia, Portugalia, Rumania, Serbia, Spanja, Tajlanda dhe Mbretëria e Bashkuar.

Sulmet izraelite goditën Rafahun

Zyrtarët e spitalit palestinez thanë se sulmet ajrore izraelite në qytetin jugor Rafah në Rripin e Gazës vranë të paktën pesë persona.

Më shumë se gjysma e popullsisë prej 2.3 milionë banorësh të territorit kanë kërkuar strehim në Rafah, ku Izraeli ka kryer bastisje pothuajse ditore ndërsa përgatitet për një ofensivë në qytet.

Ushtria izraelite ka grumbulluar dhjetëra tanke dhe automjete të blinduara në zonë në atë që duket të jetë përgatitje për një pushtim të Rafahut.

Në qendër të Gazës, katër persona u vranë nga bombardimet e tankeve izraelite.

"Pak progres, por jo mjaftueshëm në dërgimin e ndihmave"

Gaza veriore po shkon ende drejt zisë së bukës, sepse Izraeli nuk ka lejuar shpërndarjen e përditshme të ushqimit dhe sendeve të tjera kritike për qindra mijëra njerëz në nevojë të dëshpëruar, thotë zëvendësshefi i agjencisë së ushqimit të OKB-së.

Carl Skau, zëvendësdrejtori ekzekutiv i Programit Botëror të Ushqimit, tha të enjten se është bërë pak përparim që kur Izraeli mori zotim më 5 prill për të përshpejtuar dërgesat e ndihmave, por jo mjaftueshëm.

Shtatë deri në 12 kamionë kanë shkuar në zonë çdo ditë të dytë, ose çdo të tretën ditë në tre javët e fundit, tha ai, me të paktën 30 kamionë të nevojshëm çdo ditë.

"Ne nuk e kemi parë atë ndryshim paradigme që nevojitet për të shmangur një zi buke," tha Skau.