Gani Strazimiri është kujtuar në 30 vjetorin e vdekjes për kontributin e vyer në arkitekturë. Përgjatë aktivitetit karikaturisti Bujar Kapexhiu kërkoi përdorimin e emrit të arkitektit në shkresat zyrtare të institucionit që mban emrin e tij, kurse i biri tha se i ati s’do ishte pajtuar me atë që po i ndodh Tiranës sot.
Nga SYRI TV
30 vjetori i ndarjes nga jeta të arkitektit Gani Strazimiri është përkujtuar, mes familjarëve, historianëve, arkeologëve, studiuesve e njohësve të artit, përmes një ndalese të gjatë në jetën e veprimtarinë e tij. Në nder të figurës e kontributit të vyer në fushën e arkitekturës Instituti Kombëtar i Trashëgimisë Kulturore mban emrin “Gani Strazimiri”, megjithëse ky emër nuk figuron në shkresat zyrtare të institucionit.
Ish-kryeministri Aleksandër Meksi e ndali fjalën në luftën e Strazimirit për mbrojtjen e monumenteve të kulturës, në kohën kur regjimi diktatorial synonte degradimin e më vonë shembjen e tyre.
Arkitekti pati një vizion tjetër për kryeqytetin. Konceptimi i objekteve me pak kate, në një Tiranë që do të jetonte mes gjelbërimit, nuk ngjason asfare me kullat shumëkatëshe, që i marrin frymën kryeqytetit të Shqipërisë.
Pjesë e aktivitetit ishte dhe ekspozita me foto e dokumenta, që flasin për personalitetin, që shpesh e quajnë babai i arkitekturës shqiptare.
© SYRI.net