Dje një zyrtar shumë i lartë i Departamentit Amerikan të Shtetit deklaroi se: Është për të ardhur turp sesi udhëheqës politikë të Ballkanit, mirëpriten në shumë kryeqytete europiane, sikur aktet e tyre nuk përbëjnë asgjë te keqe. Kur kryeqytetet e këtyre vendeve i shohin udhëheqësit e tyre në takime të nivelit të lartë, në Europë apo Uashington, ata nxjerrin përfundime”. Një përfundim shumë i saktë po shumë i vonuar. Shumë turp që ka krijuar neveri edhe te shumë shqiptarë.

Por turp edhe më i madh është kur ish-lider perëndimorë, të akuzuar në vendet e tyre perëndimore për korrupsion apo afera të tjera moralisht të dënueshme, me një reputacion të dëmtuar dhe të dyshimtë në vendet e tyre, shfaqen për krah liderave të korruptuar e autoritarë të Ballkanit duke pozuar përpara syve të qytetarëve të varfër e keqqeverisur.

Këta ish-lider perëndimorë keqpërdoren nga liderat e korruptuar dhe autoritarë të Ballkanit, si këshilltarë për ti bërë makiazh qeverisjeve të tyre të korruptuara e të inkriminuara apo si ndërmjetës për të realizuar takime të rëndësishme në Uashington apo Europë, apo shkruar artikuj lavdërues ne mediat e tyre për liderat e Ballkanit që urrehen nga qytetarët e tyre.

Në jo pak raste, këta ish-lider perëndimorë të “korruptuar” paguhen majmërisht edhe për të zbukuruar raportet e institucioneve ndërkombëtare dhe i zhveshur ato nga kritika të arsyeshme e të faktuara për keqqeverisje, korrupsion, inkriminim të drejtuesve autoritarë dhe pseudodemokratë të Ballkanit që dhunojnë qytetarët e tyre. Këto marrëdhënie janë në pothuajse të gjithë rastet jo transparente dhe të bazuara në skema korruptive përmes të cilave kanalizohet e taksapaguesve të varfër të vendeve të Ballkanit.

Vizitat e udhëheqësve të Ballkanit në Uashington dhe Europë si dhe vizitat e dyshimta dhe të fshehta të ish-liderëve perëndimorë të “korruptuar” në krah të “strongmanëve” të korruptuar dhe të inkriminuar të Ballkanit kanë dëmtuar në mënyrë të konsiderueshme imazhin e modelit të perëndimit në sytë e qytetarëve të Ballkanit që presin shumë nga Uashingtoni dhe Europa. Kjo është një nga arsyet kryesore që ata pasi kanë humbur shpresën nga keqqeverisja e klasës së tyre politike bëhen edhe më pesimistë sepse edhe nga qëndrat e rëndësishme të demokracisë vijnë mesazhe të dykuptimta.

Por më e rëndësishmja që Uashingtoni dhe Eurpoa duhet të jenë të ndërgjegjshëm e të përgatitur është se edhe qasja e gabuar e “stabilitetit përpara demokracisë” ka çuar në një stabiltet fals në të gjithë vendet e Ballkanit, gati për të shpërthyer në çdo moment, shpërthim që mund të dalë edhe jashtë kufijve nacionalë për shkak edhe të retorikave nacionaliste të këtyre liderëve të korruptuar dhe të lidhjeve të tyre të dyshimta me qarqe të treta jo perëndimore.

Rasti më tipik në Shqipëri janë vizitat e fshehta dhe roli i dyshimtë i Toni Blerit, i cili ka humbur shumë në imazhin pozitiv që gëzonte tek shqiptarët por që aktualisht mesa duket po keqpërdoret nga Rama për të maskuar aferat e tij korruptive.