Studentja shqiptare Silvana Doçi ka arritur të largohet sot nga qyteti karantinë kinez Wuhan, ku kishte mbetur e izoluar në kampusin universitar për shkak të koronavirusit, në gjendje të mirë shëndetësore. Evakuimin e saj e ka mundësuar qeveria turke, me avion turk, me kërkesë të Ministrisë shqiptare për Punët e Jashtme.
Por Doçi, pavarësisht nga fakti se është larguar pa simptoma të sëmundjes, është e detyruar të qëndrojë 14 ditë në karantinë në Turqi, një masë e detyrueshme kjo në kushtet kur ajo ka udhëtuar me 45 pasagjerë të tjerë nga Wuhan.
Grupi i të evakuuarve, i cili përbëhet nga shtetas turq, azerbajxhanas, gjeorgjianë dhe një shqiptar pritet të mbërrijë në Ankara rreth orës 19:00 sipas kohës lokale.
Në një deklaratë, Ministria e Shqipërisë për Evropën dhe Punët e Jashtme njoftoi se me përfaqësitë e saj në Pekin dhe Ankara, realizuan me sukses evakuimin nga Wuhan të studentes shqiptare. Në deklaratën për mediat thuhet:
"Ministria për Evropën dhe Punët e Jashtme në bashkëpunim dhe komunikim të vazhdueshëm me Ambasadat shqiptare në Pekin dhe Ankara, kanë punuar intensivisht për të finalizuar me sukses largimin nga Wuhan të studentes shqiptare Silva Doçi, e cila mbeti e izoluar brenda ambienteve të kampusit universitar në këtë qytet, pas masave të marra për izolimin e tij në 23 janar 2020.
Ministria për Evropën dhe Punët e Jashtme duke e ndjekur me prioritet çështjen e studentes shqiptare, në kushtet e vështira kur askush nuk mund të hynte apo dilte në Wuhan, prej ditësh ka qenë në kontakte me palën turke, duke i paraqitur kërkesën zyrtare për të përfshirë edhe studenten shqiptare në operacionin e largimit të ndërmarrë për shtetasit turq që jetonin në Wuhan.
Në vijim të komunikimeve, pala turke u dakordësua që studentja Silva Doçi të udhëtojë në avionin ambulant turk.
Pas përfundimit të procedurave zyrtare me autoritetet kineze për lejimin e largimit të tyre nga Wuhan, avioni nga Kina u nis sot drejt aeroportit ushtarak në Ankara.
Studentja shqiptare, Silva Doçi ka kryer të gjitha testet dhe ka dalë negative për virusin nCOV, por udhëtimi i gjatë në një avion me mbi 45 persona të tjerë të evakuuar nga Wuhan, e bën të detyrueshëm qëndrimin e saj në karantinë. Çdo shtetas që del nga provinca Wuhan, është i detyruar t`i nënshtrohet një regjimi mjekësor karantine 14 ditor para se të lëvizë lirshëm.
Për këtë fazë evakuimi, Ministria për Evropën dhe Punët e Jashtme vazhdoi kontaktet e pandërprera me Ministrinë e Jashtme turke, me qëllim vijimin e regjimit të karantinës së studentes shqiptare në Turqi.
Ministria për Evropën dhe Punët e Jashtme po ndjek dhe do të vazhdojë të ndjekë të gjithë procedurën e evakuimit të studentes shqiptare, deri në mbërritjen e saj pranë familjes në Shqipëri."
© SYRI.net
Komunat votojnë kundër financimit komunal të Qeverisë për vitin 2025-2027
Bislimi: Serbia kërkon që strukturat ilegale të financohen deri në krijimin e Asociacionit
Franca kërkoi zgjedhje të reja në Veri, cilat janë mundësitë tjera pasi opsioni përmes peticionit u dogj?
Denonco
Merrni lajmet më të fundit nga SYRI.net në çdo moment dhe kudo që të jeni!
