Hykmete Bajrami pas deklaratës së ministres serbe: Kurti ta mbajë premtimin dhe ta padisë Serbinë për gjenocidin në Kosovë

Pas deklaratës së ministres së Qeverisë së Serbisë, Snezhana Paunoviq, se “po të ishte në vend të Sllobodan Millosheviqit do ta kishte përfunduar spastrimin etnik në Kosovë”, deputetja e zgjedhur e Lidhjes Demokratike të Kosovës (LDK), Hykmete Bajrami, i ka kërkuar kryeministrit në detyrë, Albin Kurti, ta mbajë premtimin për inicimin e padisë ndaj Serbisë për gjenocidin e kryer në Kosovë.

Bajrami e ka cilësuar deklaratën e zyrtares serbe si “tronditëse dhe të papranueshme”, duke thënë se një deklaratë e tillë nuk paraqet vetëm një qëndrim personal, por përpjekje për të legjitimuar politikat kriminale të regjimit të Sllobodan Millosheviqit.

“Kur një zyrtare e lartë e shtetit shpreh keqardhje që një nga krimet më të rënda në Evropën e pas Luftës së Dytë Botërore nuk u çua deri në fund, ajo nuk po jep thjesht një mendim, por ajo po përpiqet të legjitimojë një politikë kriminale”, ka shkruar Bajrami.

Ajo ka thënë se deklarata e ministres serbe është fyerje për mijëra viktima të luftës në Kosovë dhe për familjet që ende kërkojnë të pagjeturit e tyre.

“Kjo deklaratë është fyerje për mijëra viktima të luftës, për familjet që ende kërkojnë më të dashurit e tyre dhe për të gjithë ata që kanë përjetuar krimet e regjimit të Millosheviqit”, ka deklaruar deputetja e zgjedhur e LDK-së.

Sipas saj, deklarata e Paunoviqit tregon se në Serbi ende ka zyrtarë që nuk distancohen nga e kaluara kriminale.

“Serbia ende ka zyrtarë që jo vetëm nuk distancohen nga e kaluara kriminale, por vazhdojnë ta glorifikojnë atë”, ka shkruar Bajrami.

Ajo ka kërkuar që Bashkimi Evropian dhe Shtetet e Bashkuara të Amerikës ta dënojnë këtë deklaratë, ndërsa ka insistuar që Qeveria e Kosovës të kalojë nga deklaratat në veprime.

“Premtimi për inicimin e padisë kundër Serbisë në Gjykatën Ndërkombëtare të Drejtësisë për gjenocidin e kryer në Kosovë duhet të realizohet pa vonesa. Për këtë proces tashmë jemi vonuar”, ka thënë Bajrami.

Ajo ka shtuar se çdo vonesë në këtë proces është dështim në mbrojtjen e së vërtetës historike, drejtësisë për viktimat, të pagjeturit dhe dinjitetit të shtetit të Kosovës.

© SYRI.net

Lexo edhe:

• Ambasadori francez mesazh partive: Gjejeni vetë kompromisin dhe daljen nga bllokimi
• “Kosova e ka paguar me jetë njerëzish”, Rama kërkon dënim të deklaratës së ministres serbe
• Deklarata për spastrim etnik, Kosova shpall ‘non grata’ ministren serbe