Ndërsa festimet e Vitit të Ri Hënor fillojnë në mbarë botën, viti 2026 shënon Vitin e Kalit, një simbol i ecjes përpara, pavarësisë dhe qëndrueshmërisë. Këtë herë bëhet fjalë për Vitin e Kalit të Zjarrit, një rikthim i rrallë dhe i fuqishëm që ndodh vetëm një herë në 60 vjet.
Viti i Ri Hënor, i njohur edhe si Viti i Ri Kinez, bie mes fundit të janarit dhe mesit të shkurtit, sipas kalendarit të lashtë hënor-diellor kinez. Që prej të paktën shekullit të dytë para Krishtit, çdo vit i ri mban emrin e njërit prej 12 kafshëve të zodiakut kinez, të cilat përsëriten në një cikël 12-vjeçar. Në astrologjinë kineze, secila kafshë ka tipare të veçanta që besohet se pasqyrohen tek njerëzit e lindur në atë vit.
Gjatë festimeve të këtij viti, simboli i Kalit të Zjarrit do të jetë kudo, në zbukurime, në zarfe, kartolina dhe letër ambalazhi për dhuratat e Vitit të Ri Hënor.
Ja çfarë simbolizon Viti i Kalit të Zjarrit.
Kali është shumë i vlerësuar në kulturën kineze për rolin e tij të gjatë në bujqësi, transport dhe luftë, thotë Jonathan H. X. Lee, profesor i studimeve aziatike në Universitetin Shtetëror të San Franciskos. Në zodiakun kinez, kali simbolizon forcën, hijeshinë, qëndrueshmërinë, besnikërinë, lirinë dhe suksesin. Forca e tij, sipas Lee, përfaqëson mundësi për rritje personale dhe arritje.
Kjo shprehet edhe në një idiomë kineze: "Kur vjen kali, vjen edhe suksesi." Energjia e kalit lidhet me energjinë "yang", e cila është aktive, dinamike dhe krijuese, dhe lidhet me ambicien dhe gjallërinë.
Në astrologjinë kineze, vitet e Kalit favorizojnë veprime të vendosura dhe pavarësi, por paralajmërojnë edhe kundër nxitimit të tepruar.
Edhe pse kanë kaluar vetëm 12 vjet nga Viti i fundit i Kalit, kanë kaluar 60 vjet nga Viti i fundit i Kalit të Zjarrit.
Përveç ciklit 12-vjeçar të kafshëve, kalendari hënor kinez përfshin edhe pesë elemente tradicionale: tokën, drurin, zjarrin, metalin dhe ujin. Ndërsa kafsha ndryshon çdo vit, elementi ndryshon çdo dy vjet.
Prandaj 2024 ishte Viti i Dragoit të Drurit, 2025 ishte Viti i Gjarprit të Drurit, 2026 do të jetë Viti i Kalit të Zjarrit, ndërsa 2027 do të jetë Viti i Dhisë së Zjarrit. Kombinimi i 12 kafshëve me pesë elementet do të thotë se çdo kombinim i veçantë kafshë-element ndodh vetëm një herë në 60 vjet. Viti i fundit i Kalit ishte në 2014, kur u shoqërua me elementin e drurit.
Kali i Zjarrit ka të njëjtat tipare si kali: fuqi, energji, pavarësi, besnikëri dhe begati. Por këto tipare forcohen edhe më shumë nga elementi i zjarrit, që konsiderohet më i paqëndrueshmi nga pesë elementet tradicionale.
"Pas zjarrit vjen rritja," thotë Lee. Kjo do të thotë se do të ketë shumë mundësi për zhvillim, prandaj njerëzit inkurajohen të ecin përpara me qëllimet personale, të pranojnë ndryshimin dhe të përballojnë sfidat për të arritur shpërblimin përfundimtar.
Kali i Zjarrit përshkruhet si një kafshë që vrapon shpejt, çka tregon se 2026-ta do të jetë një vit me zhvillime të shpejta. Ekspertët thonë se Viti i Kalit do të kërkojë "veprime të guximshme dhe marrje rreziku", në kontrast të qartë me vitin 2025, Vitin e Gjarprit të Drurit, që shihej si një kohë për përparim të kujdesshëm.
Vitet e Kalit të Zjarrit, të quajtura edhe vite Bing-Wu, sipas Xiaohuan Zhao, profesoreshë e studimeve kineze në Universitetin e Sidneit, historikisht "tronditin rendin ekzistues" të shoqërive. Sipas saj, ekziston prej kohësh një lidhje në traditën historike mes viteve Bing-Wu dhe periudhave të paqëndrueshmërisë sociale ose politike.
Viti i fundit i Kalit të Zjarrit ishte në 1966-ën, një vit që shënoi fillimine Revolucionit Kulturor në Kinë, tragjedinë e Aberfanit në Uells dhe përshkallëzimin e Luftës së Vietnamit. / NationalGeographic – Syri.net
© SYRI.net
Denonco
Merrni lajmet më të fundit nga SYRI.net në çdo moment dhe kudo që të jeni!
IHMK: Java nis me reshje e stuhi lokale, nga e enjtja rikthehen temperaturat deri në 33 gradë
Prokuroria Speciale paralajmëron ngritjen e aktakuzës për sulmin ndaj familjes Jashari
LIVE/ Dita e 22-të e protestës qytetare në Tiranë, kërkohet dorëheqja e kryeministrit Edi Rama