SBASHK-u ultimatum autoriteteve: Lironi mësimdhënësin ose greva do të përshkallëzohet në nivel vendi

Sindikata e Bashkuar e Arsimit, Shkencës dhe Kulturës (SBASHK) i ka drejtuar një paralajmërim të prerë institucioneve të drejtësisë: ose lirimin e menjëhershëm të mësimdhënësit Abaz Kadriu, ose përballjen me një valë grevash që do të shtrihen në të gjithë Kosovën.

Mëngjesin e së martës, kolektivi i shkollës fillore të mesme të ulët “Pavarësia” në Prishtinë pezulloi procesin mësimor për dy orë. Kjo grevë erdhi si shenjë revolte ndaj arrestimit të kolegut të tyre, Abaz Kadriu, i cili u ndalua të hënën për 48 orë nën dyshimin për “sulm fizik”.

Përfaqësuesi i SBASHK-ut, Ymer Ymeri, i cili ishte i pranishëm në grevë, deklaroi se versioni i ngjarjes është krejtësisht ndryshe nga ai i autoriteteve. Sipas tij, mësimdhënësi nuk ishte agresori, por viktima.

Mësimdhënësi Kadriu është sulmuar në vendin e punës. Kjo nuk është ngjarje që po ndodh për herë të parë. Ka raste kur mësimdhënësit sulmohen fizikisht edhe nga prindërit brenda ambienteve shkollore,” u shpreh Ymeri.

SBASHK-u kërkon që organet e drejtësisë të veprojnë me shpejtësi për zbardhjen e së vërtetës. Pikat kryesore të reagimit të tyre janë: Pushimi i masës së ndalimit për arsimtarin Kadriu, marrja e masave ndaj prindërve që, sipas sindikatës, lejojnë apo nxisin sjellje të tilla agresive ndaj personelit arsimor dhe mbrojtje më e madhe për mësimdhënësit që sulmohen brenda sallave të mësimit.

Ymeri paralajmëroi se durimi i sindikatës është drejt fundit. Nëse nuk ka një reagim reflektues nga prokuroria, greva dyorëshe e një shkolle mund të kthehet shumë shpejt në një bllokim total të sistemit arsimor në shkallë vendi.

“Nëse ngjarjet nuk sqarohen shpejt dhe nuk lirohen mësimdhënësit, mund të përshkallëzohet kjo formë e veprimit sindikal,” tha ai.

© SYRI.net

Lexo edhe:

• IHMK: Java nis me reshje e stuhi lokale, nga e enjtja rikthehen temperaturat deri në 33 gradë
• Prokuroria Speciale paralajmëron ngritjen e aktakuzës për sulmin ndaj familjes Jashari
• LIVE/ Dita e 22-të e protestës qytetare në Tiranë, kërkohet dorëheqja e kryeministrit Edi Rama