Kryetari i Farmacistëve thotë se Remdesiviri nuk duhet përdorur në asnjë mënyrë si vetmjekim
10:28, 21/12/2020
Kryetari i Odës së Farmacistëve të Kosovës, Arianit Jakupi ka folur edhe njëherë rreth produktit Remdesivir i cili përdoret si terapi për mposhtjen e virusit korona.
Përmes një shkrimi në Facebook, ai ka numëruar disa prej studimeve kryesore që janë bërë në lidhje me efektin e këtij produkti.
Sipas tij, është shumë e rëndësishme që marrja e kësaj ampule të bëhet vetëm në bazë të vlerësimit të detajuar të secilit pacient individual për indikacion nga ana e klinicisteve në klinikën/at infektive dhe në asnjë mënyrë si vetmjekim.
Shkrimi i plotë:
Edhe një herë - rreth produktit Remdesivir me shkas nga shkrimet e ndryshme:
1. Produkti Remdesivir posedon Autorizimin Emergjent për Marketing nga EMA dhe FDA.
2. Ky aprovim vjen nga rezultatet që vijnë nga studimet klinike gjithashtu të aprovuara.
3. OBSh ka dhënë rekomandim të kushtëzuar më 20 Nëntor se produkti në rastet e hospitalizuara nuk jep efikasitet signifikant. Por gjithashtu thuhet nga OBSh se nuk ka evidencë të plotë për këtë gjë.
4. EMA ka dale me informata të plotësuara të publikuara në vebfaqen zyrtare më 7 dhjetor lidhur me produktin dhe kur ai indikohet - sqarimet më poshtë (dmth pas datës 20 Nëntor pasi OBSH doli me një rekomandim të kushtëzuar).
5. Sipas këtyre informatave në dispozicion dhe të gjitha studimeve në dispozicion deri tani (disa të sqaruara më poshtë) produkti Remdsivir:
a. lejohet të përdoret, deri sa Autorizimi (nga EMA dhe FDA) është në fuqi,
b. gjithashtu me Ligjin për COVID në Kosovë i jepet e drejta e trajtimit
c. protokolli është i aprovuar nga MSH si dhe
d. importi bëhet sipas procedurave që lejohen nga AKPPM (e cila me të drejtë e lejon inportin e produktit),
Mirëpo është shumë e rëndësishme që kjo të bëhet vetëm në bazë të vlerësimit të detajuar të secilit pacient individual për indikacion nga ana e klinicisteve në klinikën/at infektive dhe në asnjë mënyrë si vetmjekim.
Sipas studimit nga autorët Beigel J me bashkëpunëtorë i publikuar në revistën prestigjioze New England Journal of Medicine ata vijnë në përfundim se sipas të dhënave të tyre Remdesivir ishte superior ndaj placebo dhe koha e shërimit më e shkurtë te të rriturit e hospitalizuar me COVID-19 dhe që kishte dëshmi për infeksion të traktit respirator. (Studimi ishte i financuar nga National institute of Allergy and Infectious Diseases dhe të tjerë: ACTT-1 me numër të studimit klinik NCT04280705.)
Sipas EMA studimi kryesor (NIAID-ACTT-1) i cili ka përfshirë 1063 pacientë të hospitalizuar me COVID-19 (120 të sëmurë lehtë deri mesatar dhe 943 të sëmurë rëndë) kanë treguar se Veklury (Remdesivir) mund të shpejtojë kohën e shërimit në disa pacientë, duke u mundësuar atyre që të qëndrojnë më pak në spital apo të kenë trajtim më të shkurtë.
Ky studim tregoi, se në popullatën e përgjithshme të studiuar, pacientët e trajtuar me Veklury (Remdesivir) u shëruan pas 11 ditë krahasuar me 15 ditë për pacientët e trajtuar me placebo.
Për pacientët e sëmurë rëndë që kanë pasur nevojë për oksigjenim shtesë koha e shërimit ishte 12 ditë për pacientët që ju administrua Remdesivir krahasuar me 18 ditë për pacientët me placebo.
Megjithatë nuk u vërejt ndryshim në kohën e shërimit për pacientët e sëmurë rëndë që tashmë kanë filluar ventilimin mekanik ECMO (Extracorporeal membrane oxygenation).
Nuk u vërejt ndryshim as te pacientët e sëmurë lehtë/mesatarisht që nuk kanë pasur nevojë për oksigjen: koha e shërimit 5 ditë për të dy grupet atë me remdesivir dhe atë placebo.
Remdesivir ka treguar efekt klinik domethënës në kohën e shërimit të pacientëve me COVID-19 me pneumoni dhe që kanë nevojë për oksigjenim shtesë, duke u toleruar mirë dhe me pak efekte anësore. EMA prandaj ka theksuar se përfitimi i Remdesivir është më i madh se rreziku dhe prandaj edhe është autorizuar për përdorim në Bashkimin Europian.
Në këtë kontekst të emergjencës së shëndetit publik dhe nevojës urgjente për trajtimin e COVID-19, Veklury-Remdesivir ka marrë autorizimin e kushtëzuar për marketing. Kjo do të thotë se priten ende dëshmi për produktin të cilat kërkohet që kompania ti dorëzojë. Agjencia do ti rishikojë të gjitha informatat e reja sapo të bëhen të qasshme dhe do të bëjë përditësimet e nevojshme.
Ka edhe shumë studime mbështetëse për remdesivir dhe deri sa nuk ka dëshmi që rreziku është më i madh se përfitimi, EMA dhe FDA (si agjenci rregullatore dhe autoriteti i vetëm kompetent për lejimin-moslejimin e përdorimit të barnave në BE/SHBA) do të mbajnë në fuqi autorizimin për marketing dhe prandaj edhe do të jetë i lejuar përdorimi gjë e cila mundësohet pastaj nga AKPPM në Kosovë.
© SYRI.net
Lexo edhe:
Strazimiri: Ndërkombëtarët faktuan se Basha është një mashtrues, reforma zgjedhore do të bëhet me konsensus
Vizita e Klinton/ Ngjela: Kisha ftesë po nuk vajta se kisha frikë se më lënë në këmbë
VIDEO/ Nador Bakalli: Pa votën e diasporës kjo mazhorancë nuk shkulet
Denonco
