Në fund të izolimit në mes të muajit maj, kombi 1.8 milionësh përjetoi rritje të rasteve në korrik dhe gusht, duke detyruar qeverinë që të rikthejë një pjesë të masave. Rastet e përditshme me COVID-19 në Kosovë kanë pësuar rënie prej 44 për qind në krahasim me një muaj më herët, shkruan më tej AP-ja. Të hënën, Instituti Kombëtar i Shëndetësisë Publike në Kosovë njoftoi për 79 raste të reja me infeksion, duke e çuar totalin e rasteve të konfirmuara në 15 mijë e 142. 615 persona kanë humbur betejën me sëmundjen.

Salih Ahmeti, kreu i njësisë për rastet me COVID-19 në Qendrën Klinike Universitare të Kosovës në Prishtinë, ka thënë se respektimi i masave parandaluese ishte arsyeja kryesore që çoi në reduktim të numrave. Përdorimi i maskave, distancomi social, sjelljet e duhura në hapësirat e mbyllura dhe të hapura, ishin faktorët kyç që kontribuan në rënien drastike të numrave, ka thënë ai.

“Mendoj se së fundmi, mbikëqyrja e masave parandaluese në rend të parë, përdorimi i maskave, mbajtja e distancës fizike, sjelljet e duhura në hapësirat brenda dhe jashtë nga qytetarët, kanë qenë faktorët kyçë që kanë reduktuar numrin e rasteve të reja dhe sigurisht përkushtimi i të gjithë punëtorëve shëndetësorë, në hospitalizim, në gjurmimin e rasteve të kontaktit dhe në izolim të shpërndarjes nga rastet e mundshme të kontaktit”, ka thënë Ahmeti.

Aktualisht në Kosovë janë 1853 raste aktive, nga më shumë se 4000 sa ishin në fillim të muajit gusht.

Bartja e maskave është e obligueshme edhe me ligj.

Dikush që rri pa maskë gjobitet me 35 euro, ndërsa ai që shkel orën policore, nga 22:30 deri në 05:00, duhet të paguajë gjobë deri në 200 euro.

Pavarësisht qetësimit të situatës, departamenti i sëmundjeve infektive ishte i mbushur përplot. Shemsedin Dreshaj, kreu i Intensivës në QKUK, ka thënë se pajisjet për terapinë me oksigjen ishin në sasi të pakët, por ka shtuar se shpreson që një valë e re e koronavirusit do të jetë më e lehtë në krahasim me të parën.

Ai po ashtu ka thënë se pacientëve shpesh u duhet të blejnë ilaçe privatisht.

Shpërthimi i virusit po ashtu ka gjetur shtetin në krizë politike dhe në kohë të tentimit të normalizimit të raporteve me Serbinë, përfundon shkrimi i AP-së.