Interi është shumë pranë mbylljes së një tjetër transferimi të rëndësishëm në merkaton e verës. Mbrojtësi anglez John Stones pritet të jetë përforcimi më i ri i zikaltërve, pasi palët kanë arritur një marrëveshje verbale.

Sipas raportimeve të medieve italiane, kontrata e 31-vjeçarit me Manchester Cityn përfundoi më 30 qershor, duke i hapur rrugën transferimit si lojtar i lirë.

Pas kontakteve të zhvilluara në javët e fundit, drejtuesit e Interit, Piero Ausilio dhe Giuseppe Marotta, kanë bindur Stones të pranojë një kontratë dyvjeçare me vlerë 4 milionë euro në sezon.

Në garë për mbrojtësin anglez ishin edhe Chelsea, Arsenali, Juventusi dhe Napoli.

Megjithatë, Stones ka vendosur t'i japë përparësi Interit, duke e afruar marrëveshjen drejt finalizimit.

Nëse nuk do të ketë ndryshime të minutës së fundit, John Stones pritet të zyrtarizohet në ditët në vijim si lojtari më i ri i Interit, duke forcuar repartin e mbrojtjes për sezonin e ardhshëm.