Vetëm pak muaj pas rinovimit të bujshëm të kontratës, Bayerni i Mynihut duket se ka nisur të rishikojë të ardhmen e Alphonso Davies.

Në shkurt të vitit 2025, kampionët e Gjermanisë njoftuan zgjatjen e marrëveshjes me mbrojtësin kanadez deri në verën e vitit 2030, me një pagë të konsiderueshme që sipas raportimeve arrin shifra shumë të larta.

Megjithatë, rreth një vit e gjysmë më vonë, situata ka ndryshuar.

Davies ka humbur besimin e plotë te trajneri Vincent Kompany, ndërsa mungesat e gjata për shkak të dëmtimeve kanë treguar se Bayerni mund të funksionojë edhe pa praninë e tij në formacion.

Për këtë arsye, një largim i 25-vjeçarit gjatë kësaj vere nuk konsiderohet më një skenar i pamundur në Mynih.

Klubi gjerman është i hapur për një shitje, nëse vjen një ofertë e përshtatshme.

Megjithatë, gjetja e një blerësi nuk pritet të jetë e lehtë. Historia e dëmtimeve të Davies në sezonet e fundit dhe paga e tij e lartë mund të komplikojnë një transferim të mundshëm.

Sipas raportimeve të "Sport Bild", mbrojtësi kanadez përfiton rreth 15 deri në 20 milionë euro në sezon, një shifër që mund të kufizojë numrin e klubeve të interesuara.

Davies mbetet një nga mbrojtësit e majtë më të talentuar në botë, por e ardhmja e tij në “Allianz Arena” tashmë duket më e pasigurt se kurrë.