Barcelona vazhdon të lëvizë në merkaton e verës për të përforcuar repartin ofensiv. Ndërsa klubi katalanas pret zhvillime për transferimin e Julian Alvarez-it, nga Anglia vjen një lajm surprizë që lidhet me Harry Kane.

Sipas raportimeve të mediave angleze, Barcelona ka bërë një sondazh për sulmuesin e Bayern Munich, duke e konsideruar atë si një nga objektivat kryesorë për sulmin dhe jo thjesht si një alternativë. Kontrata e kapitenit të Anglisë me kampionët e Gjermanisë skadon në verën e vitit 2027, por kjo nuk i ka penguar drejtuesit katalanas të interesohen për situatën e tij.

Aktualisht Kane është i angazhuar me kombëtaren angleze në Kampionatin Botëror 2026 dhe prioriteti i tij mbetet Bayerni. Sulmuesi ka bërë të ditur se dëshiron t'i japë përparësi klubit bavarez për të diskutuar rinovimin e kontratës.

Megjithatë, Barcelona nuk ka hequr dorë nga ideja për ta transferuar 32-vjeçarin dhe, sipas të njëjtave burime, mund të rikthehet në sulm gjatë ditëve të fundit të muajit korrik, nëse situata me Bayernin nuk qartësohet.

Harry Kane mbetet një nga sulmuesit më të mirë në botë dhe afrimi i tij do të përfaqësonte një goditje të madhe për Barcelonën, e cila synon të ndërtojë një skuadër konkurruese për sezonin e ardhshëm nën drejtimin e Hansi Flick.