Një raport i gazetarit Christian Falk ka hedhur dritë mbi një marrëveshje jozyrtare mes Bayern Munich dhe Real Madridit, e cila sipas tij ka ndikuar në ndalimin e çdo zhvillimi rreth transferimit të Michael Olise.

Sipas këtij raportimi, mes presidentëve të dy klubeve, Herbert Hainer dhe Florentino Perez, ekziston një “pakt presidencial” që synon të shmangë tensionet në merkato dhe përplasjet për lojtarët kryesorë.

Ky komunikim i drejtpërdrejtë mes dy drejtuesve ka qenë vendimtar për të ulur zhurmën mediatike rreth sulmuesit francez.

Raportet e fillimit të qershorit, ku përflitej se Real Madridi po përgatiste një ofertë të madhe për Olise, kishin shkaktuar pakënaqësi te Bayern Munich.

Situata u tensionua edhe më shumë pas deklaratave publike që përmendnin shifra të larta për supertransferime, duke nxitur reagime nga drejtuesit bavarezë.

Megjithatë, sipas Falk, marrëdhënia e mirë mes dy klubeve ka bërë që situata të mos përshkallëzohet.

Dy presidentët kanë zhvilluar biseda private dhe kanë rënë dakord të mbajnë një qasje të koordinuar në merkato, duke shmangur garat e drejtpërdrejta për lojtarët e njëri-tjetrit pa njoftim paraprak.

Olise, i cili është pjesë e Bayern Munich me kontratë deri në vitin 2029 dhe pa klauzolë lirimi, mbetet plotësisht nën kontrollin e klubit gjerman.

Sipas raportimeve, kjo marrëveshje mes dy gjigantëve evropianë ka shërbyer për të qetësuar situatën dhe për të ruajtur marrëdhëniet e forta mes tyre edhe jashtë fushës së lojës.