Zvicra dhe Kanadaja do të përballen në Vankuver në ndeshjen e fundit të Grupit B të Kupës së Botës 2026, me të dyja skuadrat që janë shumë pranë sigurimit të një vendi në fazën me eliminim direkt.

Zvicra reagoi në mënyrën më të mirë pas barazimit 1-1 ndaj Katarit, duke mposhtur bindshëm Bosnjë Hercegovinën me rezultatin 4-1.

Skuadra e drejtuar nga Murat Yakin ka grumbulluar katër pikë dhe ndodhet në vendin e dytë, ndërsa një humbje e rëndë është pothuajse i vetmi skenar që mund t’ia rrezikojë kualifikimin.

Në anën tjetër, Kanadaja kryeson grupin me katër pikë falë fitores spektakolare 6-0 ndaj Katarit.

Bashkëorganizatorët e Botërorit po kalojnë një formë të shkëlqyer dhe nuk kanë pësuar humbje në dhjetë ndeshjet e fundit.

Një barazim do t’u mjaftonte për të ruajtur vendin e parë dhe për të vazhduar rrugëtimin në fazën tjetër.

Statistikat tregojnë se përballja mund të jetë mjaft e kujdesshme, pasi asnjëra skuadër nuk ka nevojë të rrezikojë gjithçka. Megjithatë, beteja për kreun e grupit mbetet e hapur dhe pritet një duel interesant mes dy ekipeve që kanë qenë ndër surprizat pozitive të këtij Botërori.

Një rezultat pozitiv do t’i afronte të dyja kombëtaret me një kapitull historik, ndërsa Kanadaja synon të arrijë për herë të parë në fazën me eliminim direkt të Kupës së Botës.