Ylli i Lionel Messi ishte protagonisti absolut në fitoren e thellë të Argentinës ndaj Algjerisë në Botërorin 2026. Kapiteni argjentinas realizoi tre gola, duke shkruar një tjetër faqe të artë në karrierën e tij të jashtëzakonshme.

Falë kësaj ‘triplete’, Messi u barazua me Miroslav Klosen në krye të listës së golashënuesve më të mirë në historinë e Kupës së Botës. Megjithatë, momenti që tërhoqi më shumë vëmendje nuk ishte rekordi, por reagimi emocional i sulmuesit pas golit të parë.

Menjëherë pasi dërgoi topin në rrjetë, Messi u pa i përlotur, duke treguar se pas ditëve të fundit kishte kaluar momente të vështira në jetën e tij personale. Pas ndeshjes, ai shpjegoi arsyen e emocionit të fortë.

“E vërteta është se kam kaluar disa ditë të vështira dhe të ndërlikuara për një çështje që nuk ka lidhje me sportin. Dua të falënderoj të gjithë delegacionin dhe shokët e skuadrës, sepse kanë qenë gjithmonë pranë meje dhe më kanë dhënë shumë forcë për t’u ndier mirë”, deklaroi Messi.

Fjalët e kampionit argjentinas prekën tifozët në mbarë botën, ndërsa shokët e skuadrës e përqafuan pas golit, duke treguar mbështetjen e tyre në një moment delikat për legjendën e futbollit.

Pavarësisht vështirësive personale, Messi vazhdon të udhëheqë Argjentinën në Botëror me paraqitje të shkëlqyera. ‘Tripleta’ ndaj Algjerisë jo vetëm që i solli një rekord historik, por tregoi edhe forcën e tij karakteriale për të kapërcyer momentet e vështira jashtë fushës së blertë.