Trajneri i Norvegjisë, Ståle Solbakken, ka kritikuar ashpër situatën politike që po shoqëron Botërorin 2026, duke folur për atë që e quajti “hipokrizi të përgjithshme” në botën e futbollit.

Tekniku norvegjez bëri komentet gjatë një konference për shtyp në Greensboro, në Karolinën e Veriut, ku kombëtarja e Norvegjisë është akomoduar para nisjes së turneut.

Solbakken u pyet për incidentin që përfshiu sulmuesin e Irakut, Aymen Hussein, i cili sipas raportimeve u mbajt për shtatë orë në aeroportin e Çikagos nga autoritetet amerikane pas mbërritjes së delegacionit irakian.

“Ne të gjithë jemi dakord se kjo është e panevojshme dhe se shumë gjëra mund të ishin bërë ndryshe, por jemi të gjithë hipokritë”, deklaroi Solbakken, duke iu referuar faktit se futbolli botëror është mbledhur në Amerikën e Veriut për Kupën e Botës.

Megjithatë, ai shtoi se, pavarësisht problemeve, skuadrat janë aty për të luajtur futboll. “Botërori organizohet këtu dhe ne jemi këtu për të luajtur futboll”, tha ai.

Kur u pyet se çfarë kishte parasysh me “shumë gjëra” që mund të ishin ndryshe, trajneri norvegjez u tregua i drejtpërdrejtë. Ai përmendi situatën ndërkombëtare dhe tensionet gjeopolitike, duke deklaruar se nga konfliktet mes shteteve deri te vështirësitë me hyrjen në vend të pjesëmarrësve, ka shumë çështje që kanë krijuar polemika rreth turneut.

Norvegjia rikthehet në Kupën e Botës për herë të parë që nga viti 1998. Në fazën e grupeve ajo do të përballet me Irakun më 16 qershor, me Senegalin më 22 qershor dhe me Francën më 26 qershor.

Deklaratat e Solbakken janë ndër kritikat më të forta të bëra deri tani nga një trajner pjesëmarrës në Botërorin 2026, duke rikthyer në qendër të vëmendjes debatet që kanë shoqëruar organizimin e turneut në Shtetet e Bashkuara, Meksikë dhe Kanada.