Pritja e gjatë ka marrë fund. Pas gati tetë vitesh nga momenti kur Kanadaja, Meksika dhe Shtetet e Bashkuara u zgjodhën organizatore të Kupës së Botës 2026, turneu më i madh futbollistik në planet nis zyrtarisht më 11 qershor.

Vëmendja e gjithë botës do të përqendrohet te Meksika, ku kombëtarja vendase do të përballet me Afrikën e Jugut në ndeshjen hapëse të Botërorit.

Sfida, e programuar për t’u luajtur në orën 21:00, pritet të sjellë emocione të mëdha dhe të rikthejë kujtimet e Botërorit 2010, kur këto dy përfaqësuese u përballën gjithashtu në ndeshjen e parë të turneut.

“El Tri” do të kërkojë ta nisë aventurën me tri pikë përpara tifozëve të vet, ndërsa Afrika e Jugut synon të surprizojë dhe të marrë një rezultat pozitiv në debutimin e saj në këtë edicion.

Ndërkohë, dita e parë e Botërorit do të vazhdojë me një tjetër përballje interesante në Grupin A.

Në Guadalajara, Koreja e Jugut do të ndeshet me Çekinë, në një duel që premton rivalitet dhe futboll cilësor. Çekët mbërrijnë me moral të lartë pas kualifikimit përmes “play-off”-eve të UEFA-s, ndërsa aziatikët synojnë të hedhin një hap të rëndësishëm drejt fazës së ardhshme.

Kështu, me dy ndeshje tërheqëse dhe me miliona tifozë të ngjitur pas ekraneve, nis zyrtarisht Botërori 2026.