Kur përballesh në një finale me Luis Enrique-n, gjërat bëhen jashtëzakonisht të vështira. Edicioni 2025/26 i UEFA Champions League buzëqeshi për Paris Saint-Germain, që arriti të mposhtte Arsenalin vetëm pas penalltive, në një finale ku anglezët u dalluan më shumë për organizimin dhe kujdesin taktik sesa për spektaklin.

Është e vërtetë që kësaj here PSG-së i buzëqeshi edhe pak fati, diçka që shpesh nevojitet për të fituar trofe, por ky sukses nuk është aspak rastësi. Ekziston një statistikë që tregon qartë se të përballesh me Luis Enrique-n në një finale mund të kthehet në një makth për çdo trajner rival.

Me triumfin e sotëm në Champions League, trajneri spanjoll ka përforcuar edhe më shumë rekordin e tij të jashtëzakonshëm personal: kjo ishte finalja e 16-të e fituar nga skuadrat e tij, nga gjithsej 19 finale të luajtura, ku 18 prej tyre kanë qenë ndeshje teke.

Nëse llogariten vetëm finalet me klube, statistika bëhet edhe më mbresëlënëse, duke qenë se e vetmja finale që ai ka humbur si trajner i kombëtares së Spanjës ishte ajo e Nations League 2021.

Po cilat janë humbjet e Luis Enrique në finale? Në ndeshje teke me klube, ai ka humbur vetëm finalen e Kupës së Botës për Klube sezonin e kaluar, kur u mposht nga Chelsea i drejtuar nga Enzo Maresca. Nëse përfshihen edhe finalet me sistem vajtje-ardhje, në bilanc hyn edhe humbja në Superkupën e Spanjës 2015 kundër Athletic Bilbaos.

Ekziston edhe një tjetër statistikë e pabesueshme: Luis Enrique është i pamposhtur te penalltitë. Gjashtë herë ka luajtur trofe që janë vendosur nga pika e bardhë dhe në të gjashta rastet ka triumfuar. Çuditërisht, të gjitha këto fitore kanë ardhur me PSG-në. Luis Enrique po konfirmohet gjithnjë e më shumë si një specialist i finaleve dhe një nga trajnerët më të suksesshëm të futbollit modern.

Finalet e fituara nga Luis Enrique:

• Kupa e Mbretit 2015: Barcelona – Athletic Bilbao 3-1
• Champions League 2015: Barcelona – Juventus 3-1
• Superkupa UEFA 2015: Barcelona – Sevilla 5-4 pas shtesave
• Kupa e Botës për Klube 2015: Barcelona – River Plate 3-0
• Kupa e Mbretit 2016: Barcelona – Sevilla 2-0 pas shtesave
• Superkupa e Spanjës 2016: Barcelona – Sevilla 3-0
• Kupa e Mbretit 2017: Barcelona – Alaves 3-1
• Trophee des Champions 2024: PSG – Toulouse 2-0
• Kupa e Francës 2024: Lyon – PSG 1-2
• Trophee des Champions 2025: PSG – Monaco 1-0
• Kupa e Francës 2025: PSG – Reims 3-0
• Champions League 2025: PSG – Interi 5-0
• Superkupa UEFA 2025: PSG – Tottenham 6-5 me penallti
• Kupa Interkontinentale 2025: PSG – Flamengo 3-2 me penallti
• Trophee des Champions 2026: PSG – Marseille 6-3 me penallti
• Champions League 2026: PSG – Arsenali 5-4 me penallti