Me sezonin futbollistik europian që po shkon drejt fundit dhe grumbullimet e Kombëtares që afrohen, futbollistët shqiptarë jashtë vendit po vazhdojnë të lënë gjurmë me paraqitjet e tyre në kampionate të ndryshme.

Ernest Muçi ka qenë një nga emrat më të spikatur të javës në futbollin turk. Sulmuesi kuqezi fitoi Kupën e Turqisë me Trabzonsporin, pas fitores 2-1 ndaj Konyasporit në finale. Muçi ishte titullar në këtë takim dhe kontribuoi në mënyrë të rëndësishme gjatë gjithë ndeshjes, duke u vlerësuar si një nga lojtarët më aktivë në suksesin e skuadrës së tij.

Edhe në Itali ka lajme të rëndësishme për legjionarët shqiptarë. Ylber Ramadani ishte titullar në fitoren vendimtare të Lecces 1-0 ndaj Genoa-s, rezultat që i siguroi skuadrës mbijetesën në Serie A për sezonin e ardhshëm. Mesfushori kuqezi zhvilloi një tjetër paraqitje të qëndrueshme në qendër të fushës, duke ndihmuar Lecce-n në një ndeshje me peshë të madhe.

Minuta si titullarë këtë fundjavë regjistruan gjithashtu edhe Ivan Balliu, Berat Gjimshiti, Ardian Ismajli, Bujar Pllana, Mario Mitaj, Juljan Shehu dhe Adrion Pajaziti, të cilët vazhdojnë të jenë pjesë e rëndësishme e skuadrave të tyre në kampionatet europiane.