Arsenali ka mbyllur në mënyrën më të mirë sezonin e tij kampion në Premier League, duke mposhtur 2-1 Crystal Palace në transfertë në “Selhurst Park”, për fitoren e nëntë në 10 përballjet e fundit direkte mes tyre.

Skuadra e Mikel Artetës e nisi ndeshjen me ritëm të lartë dhe shumë shpejt rrezikoi me Gabriel Jesus, i cili goditi shtyllën që në minutat e para dhe më pas u ndal disa herë nga portieri Dean Henderson. Megjithatë, braziliani arriti të zhbllokonte rezultatin pas një asisti të Gabriel Martinellin, duke shënuar në shtyllën e parë me një goditje të fortë.

Palace pati pak raste në pjesën e parë, ndërsa tentativa më e rrezikshme erdhi nga Daniel Muñoz, por u ndal nga portieri Kepa Arrizabalaga.

Në pjesën e dytë, Arsenali dyfishoi shifrat pas një goditjeje nga këndi. Martinelli krosoi saktë në shtyllën e dytë, ku Kai Havertz e ktheu topin për Noni Madueke, i cili realizoi me një volej të saktë.

Crystal Palace u përpoq të reagonte dhe shënoi me Jean-Philippe Mateta pas një krosimi të Yéremy Pino, por goli i dytë i vendasve u anulua për pozicion jashtë loje.

Ndeshja u mbyll me fitoren e pestë radhazi për “Gunners”, të cilët ngritën trofeun në fund të një sezoni dominues, duke barazuar numrin e fitoreve të skuadrës legjendare “Invincibles”. Crystal Palace, nga ana tjetër, mbyll një seri pozitive në shtëpi, por largohet me humbje në ndeshjen e fundit të sezonit.