Tenisti spanjoll, Carlos Alcaraz, ka konfirmuar se nuk do të marrë pjesë në Wimbledon 2026, pasi ende nuk është rikuperuar plotësisht nga një dëmtim në kyçin e dorës. Lajmi është bërë publik nga vetë lojtari, i cili ka shpjeguar se procesi i rikuperimit po ecën në drejtimin e duhur, por nuk është ende gati për rikthim në garat zyrtare.

Alcaraz, dy herë kampion i Wimbledon-it, ka qenë i detyruar të mungojë edhe në Roland Garros për të njëjtin problem fizik. Ky dëmtim e ka ndjekur që nga turneu i Barcelonës në muajin prill, kur u lëndua gjatë ndeshjes së raundit të parë ndaj Otto Virtanen. Më pas, gjendja e tij u përkeqësua, duke e detyruar të tërhiqet nga ndeshja e raundit të dytë.

Për shkak të kësaj situate, ai ka munguar gjithashtu në turnetë e rëndësishëm të Madridit dhe Romës, të cilat u fituan nga Jannik Sinner, duke ndryshuar ndjeshëm garën në krye të renditjes botërore.

Në një mesazh të publikuar në rrjetet sociale, Alcaraz u shpreh se rikuperimi i tij po shkon mirë, por nuk është ende në gjendje të garojë në nivelin e kërkuar për turne të mëdhenj si Wimbledon apo turnetë përgatitore në fushë bari, përfshirë Queen’s.

“Rikuperimi im po shkon mirë dhe ndihem shumë më mirë, por fatkeqësisht ende nuk jam gati për të garuar, prandaj duhet të tërhiqem nga sezoni i fushës së barit, përfshirë Queen’s dhe Wimbledon,” shkroi ai. “Janë dy turne shumë të veçantë për mua dhe do të më mungojnë shumë. Do të vazhdojmë të punojmë për t’u kthyer sa më shpejt.”

Mungesa e tij në Wimbledon përbën një goditje të madhe për turneun dhe për vetë garën e ATP-së, duke lënë të hapur garën për rivalët kryesorë në renditje.