Galatasaray ka nisur festimet madhështore pasi u shpall kampion i sezonit 2025-26 në Süper Lig, duke kurorëzuar një sezon të suksesshëm me një ceremoni spektakolare në Stamboll.

Skuadra e kuqeverdhë u nis nga Liceu i Galatasaray-t me autobusin e ekipit, duke kaluar nëpër rrugët kryesore të qytetit si Meşrutiyet Caddesi, Taksim, Tarlabaşı, Mecidiyeköy dhe shumë zona të tjera, para se të mbërrinte në stadiumin ‘RAMS Park’.

Udhëtimi i kampionëve zgjati rreth tri orë, ndërsa përgjatë gjithë itinerarit, tifozët krijuan një atmosferë të jashtëzakonshme, duke mbushur rrugët dhe duke i dhënë skuadrës një pritje të ngrohtë.

Mbështetësit nuk kursyen thirrjet dhe koret gjatë gjithë rrugës, duke shfaqur dashurinë e tyre për ekipin kampion. Në veçanti, u dëgjuan thirrje për ‘yjet’ kryesorë të skuadrës si Mauro Icardi dhe Victor Osimhen.

Një moment i veçantë u regjistrua gjatë paradës, kur një shitës rrugor i ofroi një simite mesfushorit Lucas Torreira, i cili e pranoi dhe e konsumoi nga autobusi i ekipit, duke krijuar një skenë që u bë virale mes tifozëve.

Gjatë festimeve, lojtarët e Galatasaray-t shpalosën edhe një mesazh ambicioz për të ardhmen, duke vendosur një banderolë me mbishkrimin: “Nuk na mjafton kjo kupë, synimi tani është Evropa”.

Pas një parade të gjatë në qytet, autobusi i kampionëve mbërriti në stadiumin ‘RAMS Park’, ku festa vazhdoi me mijëra tifozë dhe një ceremoni të organizuar për titullin kampion.

Galatasaray e mbylli sezonin në mënyrë triumfale, duke konfirmuar dominimin e tij në futbollin turk dhe duke nisur tashmë ëndrrën për sukses në arenën evropiane.