Portieri i OFI Crete, Klinidman Lilo, po kalon një sezon shumë pozitiv dhe është shumë pranë një thirrjeje historike në kombëtaren e Shqipërisë.

Sipas medieve greke dhe raporteve sportive, përzgjedhësi i Shqipërisë, Sylvinho, po e konsideron seriozisht ftesën e parë për portierin 23-vjeçar në grumbullimin e ardhshëm të kuqezinjve, ku do të vlerësohet nga afër në ndeshjet miqësore.

Lilo ka zhvilluar një sezon të mirë me OFI-n, duke u aktivizuar në 14 ndeshje në të gjitha kompeticionet dhe duke treguar stabilitet në paraqitjet e tij. Një moment i rëndësishëm i sezonit ishte edhe fitimi i Kupës së Greqisë, ku ai u aktivizua në finalen e turneut për disa minuta.

Forma e tij ka tërhequr vëmendjen e stafit teknik të Shqipërisë, ndërsa pritet që ai të jetë pjesë e listës për ndeshjet miqësore të qershorit ndaj Izraelit dhe Luksemburgut.

Nëse ftesa konfirmohet, kjo do të ishte hera e parë që Lilo bashkohet me ekipin e parë të Shqipërisë, pasi më parë ka regjistruar paraqitje me kombëtaren U-21 dhe U-20.

Ndërkohë, në portën e Shqipërisë luan rregullisht edhe Thomas Strakosha, duke bërë që konkurrenca në këtë repart të jetë mjaft e fortë për ndeshjet e ardhshme ndërkombëtare.