Arsenali është shumë pranë rikthimit te titulli i Premier League dhe skuadra e drejtuar nga Mikel Arteta mund të bëjë një tjetër hap gjigant në sfidën ndaj Burnleyt.

“Topçinjtë” do të kërkojnë fitoren për t’u shkëputur me pesë pikë nga Manchester City, që do të luajë një ditë më vonë në transfertë ndaj Bournemouth.

Gara për titullin mbetet e zjarrtë në javët e fundit të sezonit.

Skuadra e drejtuar nga Pep Guardiola po kalon një formë fantastike, me 14 ndeshje radhazi pa humbje në kampionat, por barazimi 3-3 ndaj Evertonit javën e kaluar mund të rezultojë vendimtar në garën për trofeun.

Arteta e konsideron humbjen 2-1 ndaj Cityt muajin e kaluar si momentin që zgjoi skuadrën e tij.

Që nga ajo sfidë, Arsenali ka fituar tri ndeshje radhazi në kampionat pa pësuar gol.

“E përdorëm atë humbje si motivim për të qenë edhe më të fortë”, deklaroi trajneri spanjoll, i cili synon t’i dhurojë Arsenalit titullin e parë kampion në Premier League që nga viti 2004.

Ndërkohë, lufta për mbijetesë mbetet dramatike. Tottenham dhe West Ham United vazhdojnë betejën për të shmangur rënien nga kategoria, ndërsa gara për një vend në Champions League është po aq e fortë.

Në këtë mes, sfida mes Aston Villës dhe Liverpoolit pritet të ketë ndikim të madh në garën për Europën, me disa skuadra që vazhdojnë të ëndërrojnë kualifikimin historik në Champions League.