Sezoni i Chelsea-t po kthehet në një makth të vërtetë dhe një nga futbollistët që po e vuan më shumë këtë situatë është Cole Palmer. Mesfushori anglez, që vetëm pak muaj më parë shkëlqente në finalen e Kupës së Botës për Klube, tashmë duket larg versionit që magjepsi tifozët në ‘Stamford Bridge’.

Chelsea po kalon një sezon zhgënjyes në Premier League, ku renditet vetëm në vendin e nëntë. Kriza sportive, rezultatet negative dhe tensioni brenda klubit kanë ndikuar dukshëm edhe te morali i lojtarëve. Palmer konsiderohet simboli më i qartë i kësaj rënieje.

Në fundin e sezonit 2024/25, anglezi kishte statistika të jashtëzakonshme me 18 gola dhe 14 asistime në 52 ndeshje. Ai ishte protagonist absolut edhe në Kupën e Botës për Klube në SHBA, ku Chelsea triumfoi ndaj Paris Saint-Germain në finale. Palmer realizoi dy gola dhe dhuroi një asistim në atë ndeshje, duke u shpallur kampion bote me londinezët.

Megjithatë, gjithçka ndryshoi me nisjen e sezonit të ri. Pavarësisht entuziazmit fillestar dhe afrimeve të reja, rezultatet nisën të përkeqësoheshin. Kriza çoi deri te shkarkimi i trajnerit Enzo Maresca-s në muajin janar, ndërsa situata nuk u përmirësua as pas ardhjes së Liam Rosenior.

Ndërkohë, forma e Palmerit ra ndjeshëm. Chelsea u eliminua fillimisht nga Liga e Kampioneve nga PSG-ja, më pas humbi në Kupën EFL ndaj Arsenal, ndërsa në kampionat vazhdon të luftojë për një vend në garat evropiane.

Shifrat e anglezit janë alarmante: që nga 4 marsi ai nuk ka kontribuar as me gola dhe as me asistime në 12 ndeshje radhazi. Problemet fizike kanë luajtur gjithashtu rol të rëndësishëm, pasi Palmer ka munguar në 25 ndeshje për shkak dëmtimesh.

Situata ka ngritur pikëpyetje edhe te Kombëtarja e Anglisë. Trajneri Thomas Tuchel raportohet se ka dyshime serioze për aktivizimin e tij si titullar në Kupën e Botës, sidomos pas paraqitjeve jo bindëse në miqësoret ndaj Uruguait dhe Japonisë.

Në Angli po shtohen edhe zërat për një largim të mundshëm të Palmerit nga Chelsea. Mungesa e harmonisë në skuadër, tensionet institucionale dhe dështimi i projektit sportiv po ndikojnë drejtpërdrejt te gjendja psikologjike e lojtarit. Dhe kjo, sipas medieve angleze, është një alarm serioz jo vetëm për Palmerin, por për të ardhmen e gjithë Chelsea-t.