Levante ka marrë një fitore tepër të rëndësishme në garën për mbijetesë, duke mposhtur në transfertë Celta Vigon me rezultatin 3-2 në një ndeshje spektakolare dhe plot emocione.

Takimi nisi në mënyrë perfekte për vendasit, që kaluan në avantazh që në minutën e 4-t me anë të Ferran Jutglà-s. Sulmuesi finalizoi një aksion të bukur dhe i dha epërsinë Celta Vigos.

Megjithatë, Levante reagoi mirë dhe arriti të barazonte në fundin e pjesës së parë, kur Arriaga realizoi për 1-1 në minutën e 43-të.

Në nisje të pjesës së dytë, Celta riktheu sërish avantazhin. Ishte përsëri Jutglà ai që gjeti rrjetën në minutën e 48-të, duke kompletuar dopietën personale.

Ndeshja mbeti e hapur dhe skuadra valenciane reagoi edhe një herë. Në minutën e 57-të, Dela shënoi golin e barazimit 2-2, ndërsa vetëm gjashtë minuta më vonë Brugue realizoi golin vendimtar për 3-2.

Me këtë sukses, Levante largohet përkohësisht nga vendi i parafundit dhe e bën edhe më dramatike garën për mbijetesë në La Liga.

Situata në fundin e tabelës është bërë jashtëzakonisht e ngjeshur, pasi tashmë shtatë skuadra, nga vendi i 13-të tek i parafundit, ndahen nga vetëm tri pikë.