Arsenali ka marrë një lajm shumë të keq në fundin e sezonit. Klubi londinez konfirmoi zyrtarisht se mbrojtësi Ben White do të mungojë në pjesën e mbetur të sezonit për shkak të një dëmtimi serioz në gju.

28-vjeçari u dëmtua gjatë ndeshjes së fundjavës ndaj West Ham United, skuadër e drejtuar nga Nuno Espírito Santo. White u detyrua të largohej nga fusha që në minutën e 28-të dhe u zëvendësua nga Martín Zubimendi.

Pas ekzaminimeve mjekësore, Arsenali bëri të ditur se lojtari ka pësuar një dëmtim të rëndë në ligamentin kolateral medial të gjurit, çka e mbyll para kohe sezonin për të.

Si pasojë, mbrojtësi anglez do të humbasë dy ndeshjet e fundit të Premier League kundër Burnley dhe Crystal Palace, por mbi të gjitha edhe finalen e shumëpritur të UEFA Champions League ndaj Paris Saint-Germain.

Problemet nuk ndalen vetëm te klubi. Sipas raportimeve të ESPN, dëmtimi do ta mbajë Ben White larg edhe nga Kupa e Botës FIFA 2026.

Edhe pse grumbullimi i tij me Anglia nuk ishte ende i sigurt, futbollisti kishte rifituar vendin në planet e trajnerit Thomas Tuchel. White ishte rikthyer te kombëtarja në muajin mars në një miqësore ndaj Uruguait, ku madje kishte realizuar gol në rikthimin e tij pas mungesës që nga viti 2022.