Derbi mes Romës dhe Lazios ka ndryshuar sërish datë dhe orar. Prefektura e Romës ka vendosur që sfida e javës së 37-të në Serinë A të luhet të hënën, më 18 maj, në orën 20:45.

Vendimi është marrë pas mbledhjes së Komitetit Provincial për Rendin dhe Sigurinë Publike, duke marrë parasysh çështjet e rendit publik dhe qarkullimit urban, për shkak të zhvillimit paralel të turneut të tenisit “Internazionali BNL d’Italia” në Foro Italico.

Megjithatë, çështja nuk përfundon këtu. Lega Serie A ka kundërshtuar vendimin e prefektit dhe ka paralajmëruar apelim, duke hapur një përplasje institucionale për kalendarin e javës së 37-të të kampionatit italian.

Një ditë më parë, Liga kishte zyrtarizuar ndeshjet e kësaj jave, duke caktuar derbin e kryeqytetit dhe sfidat e lidhura me garën për Ligën e Kampioneve – Pisa-Napoli, Como-Parma, Genoa-Milani dhe Juventusi-Fiorentina – për të dielën, në orën 12:30.

Ky vendim ishte marrë si pasojë e direktivave të Ministrisë së Brendshme italiane, e cila kishte kërkuar që derbi të mos luhej në mbrëmje për shkak të incidenteve të mëparshme, por edhe për të favorizuar tifozët dhe transmetuesit televizivë duke shmangur një ditë pune.

Administratori i deleguar i Lega Serie A, Luigi De Siervo, deklaroi për AGI se ende nuk është vendosur përfundimisht që derbi të luhet të hënën dhe theksoi se do të garantohet njëkohshmëria e ndeshjeve për skuadrat që luftojnë për të njëjtin objektiv.

Ndërkohë, presidenti i Federatës Italiane të Tenisit, Angelo Binaghi, përjashtoi mundësinë e shtyrjes së finales së turneut të tenisit, duke deklaruar se “finalja është e pamundur të lëvizet”.

Sipas rregullores së Serie A, në dy javët e fundit skuadrat që luftojnë për të njëjtin objektiv duhet të luajnë në të njëjtën kohë. Për këtë arsye, Liga ka reduktuar në vetëm pesë minuta tolerancën maksimale të vonesës mes ndeshjeve që zhvillohen paralelisht.

Aktualisht, Inter-Verona mbetet e planifikuar për të dielën, në orën 15:00, ndërsa sfidat e mbijetesës Udinese-Cremonese, Sassuolo-Lecce dhe Torino-Cagliari janë planifikuar për në orën 20:45, gjithmonë në pritje të zhvillimeve të tjera.