Java e parafundit e Bundesliga dhuroi emocione të mëdha dhe verdikte të rëndësishme në garën për zonën Champions.

Leipzig rikthehet mes më të mirëve të Europës, pasi triumfoi 2-1 ndaj St. Paulit dhe siguroi matematikisht vendin e tretë në renditje.

Skuadra e drejtuar nga Ole Werner zhvilloi një tjetër paraqitje bindëse, duke vulosur rikthimin në elitën e futbollit europian sezonin e ardhshëm.

Fitorja ndezi festën te tifozët e Leipzigut, që shohin ekipin e tyre të rikthehet në Champions League pas një sezoni shumë të fortë në kampionat.

Ndërkohë, supersfida e ditës ishte ajo mes Shtutgartit dhe Leverkusenit, një duel direkt për vendet që të çojnë në Champions.

Miqtë kaluan menjëherë në avantazh me Garcia-n që në minutën e parë, por reagimi i Shtutgartit ishte spektakolar. Ermedin Demirović, Maximilian Mittelstädt dhe Deniz Undav realizuan për vendasit, duke përmbysur gjithçka dhe siguruar një fitore të madhe 3-1.

Me këtë sukses, Shtutgarti mban për momentin vendin e katërt në renditje dhe mbetet favorit për të siguruar një biletë në Champions sezonin e ardhshëm.

Nga ana tjetër, humbja ishte një goditje e rëndë për Leverkusenin, që zbret në vendin e gjashtë dhe rrezikon seriozisht të mbetet jashtë kompeticionit më prestigjioz europian për klube.