Detroit Pistons dhe Oklahoma City Thunder vazhdojnë të dominojnë në gjysmëfinalet e “play off”-it në NBA, duke marrë avantazhin 2-0 në seritë respektive pas fitoreve të arritura mbrëmjen e fundit.

Në Konferencën e Lindjes, Detroiti triumfoi 107-97 ndaj Cleveland Cavaliers në një duel të luftuar dhe me ritëm të lartë. Pistons arritën të bënin diferencën në momentet vendimtare falë saktësisë më të madhe në sulm dhe organizimit më të mirë në mbrojtje.

Lideri i skuadrës, Cade Cunningham, zhvilloi një tjetër ndeshje shumë të mirë duke realizuar 25 pikë, ndërsa një kontribut të rëndësishëm dha edhe Tobias Harris me 21 pikë. Për Clevelandin nuk mjaftuan 31 pikët e Donovan Mitchell, me Cavaliers që tani do të përpiqen të reagojnë në dy sfidat e ardhshme në fushën e tyre.

Po aq bindës u shfaqën edhe kampionët në fuqi të Oklahoma-s, që fituan 125-107 ndaj Los Angeles Lakers në Konferencën e Perëndimit. Thunder konfirmuan edhe një herë forcën e tyre si një nga skuadrat favorite për titullin, duke dominuar pjesën më të madhe të takimit.

Për Lakers u dallua Austin Reaves me 31 pikë, por paraqitja e tij nuk mjaftoi për të shmangur humbjen e dytë radhazi. Tek Oklahoma shkëlqeu loja kolektive, pasi gjashtë basketbollistë realizuan mbi 10 pikë. Më efikasët ishin Shai Gilgeous-Alexander dhe Chet Holmgren, që e mbyllën sfidën me nga 22 pikë secili.

Në seritë e tjera gjysmëfinale, New York Knicks kryesojnë 2-0 ndaj Philadelphia 76ers në Lindje, ndërsa në Perëndim seria mes San Antonio Spurs dhe Minnesota Timberwolves është në barazim 1-1.