Goli i Harry Kane ndaj Paris Saint-Germain mund të rezultojë shumë më i rëndësishëm sesa thjesht një gol ngushëllimi për Bayern Munich.

Sulmuesi anglez realizoi në minutën e 94-t për barazimin 1-1 në gjysmëfinalen e kthimit të Ligës së Kampionëve, por PSG kaloi në finale me rezultat të përgjithshëm 6-5.

Megjithatë, ky gol mund të ndikojë drejtpërdrejt në garën mes Bundesligës dhe La Ligës për një vend shtesë në edicionin e ardhshëm të Champions League.

Barazimi i Bayernit i dha Gjermanisë 0.142 pikë në koeficientin evropian, pikë që mund të bëhen vendimtare në luftën për “European Performance Spots”, dy vendet shtesë që UEFA ua ndan kampionateve me performancën më të mirë në Evropë.

Premierliga tashmë e ka siguruar një nga këto vende, ndërsa beteja për vendin e dytë po zhvillohet mes Bundesligës dhe La Ligës.

Aktualisht, La Liga ka 21.781 pikë, ndërsa Bundesliga ndodhet shumë pranë me 21.357 pikë.

Diferenca është aq e vogël sa mund të përmbyset vetëm me një fitore dhe një barazim.

Gjermania shpreson te Freiburg, i cili synon të përmbysë humbjen 2-1 ndaj Bragës, ndërsa Spanja mbështetet te Rayo Vallecano, që mbron avantazhin 1-0 ndaj Strasbourgut.

Nëse Freiburg kualifikohet në finale dhe Rayo eliminohet, Bundesliga do ta siguronte vendin shtesë me një diferencë minimale pikësh — dhe pikërisht këtu goli i Kane mund të rezultojë vendimtar.

Ndërkohë, në Bundesligë po zhvillohet edhe një garë e fortë për vendet që dërgojnë në Champions League, me Bayer Leverkusenin, Stuttgartin dhe Hoffenheimin që luftojnë për biletën e katërt.