Trajneri i Bayern Munich, Vincent Kompany, ka dhënë një mesazh të qartë dhe pragmatik para përballjes së madhe evropiane, duke theksuar se objektivi i vetëm i skuadrës së tij është fitorja.

Kompany u shpreh se ruan gjithmonë qetësinë e brendshme dhe mundohet të mos ndikohet nga emocionet e ndeshjes para kohe.

Sipas tij, fokusi kryesor mbetet motivimi i fundit që i jep ekipit para se të zbresë në fushë.

“Me mua mbizotëron qetësia e brendshme. Mendoj për fjalën e fundit që mund ta motivojë skuadrën. Misioni ynë është të fitojmë ndeshje, kjo është thelbësore – jo filozofitë”, deklaroi ai.

Kompany pranoi se edhe kundërshtarë të fortë si Paris Saint-Germain kanë arritur suksese, por theksoi se pragmatizmi është çelësi: “Nëse fitojmë pa pësuar gol, aq më mirë. Por mbi të gjitha, rëndësi ka fitorja”.

Kompany foli edhe për lidhjen e fortë mes skuadrës dhe tifozëve, duke nënvizuar se besimi është rritur ndjeshëm gjatë sezonit.

“Ndoshta në fillim pak kush besonte se do të arrinim deri këtu, por tani jemi pranë finales. Kemi përjetuar momente të veçanta dhe tifozët besojnë tek ne. Duam ta bëjmë këtë një moment të paharrueshëm”, shtoi ai.

Sa i përket ndeshjes, trajneri belg theksoi se dinamika do të varet nga qasja e të dy ekipeve në fushë.

“Nëse njëra skuadër tërhiqet dhe mbrohet më shumë, loja mund të ketë faza më të qeta. Përndryshe, do të jetë intensive. Është e vështirë të imagjinohet që ndonjë ekip do të ndryshojë stilin që e ka sjellë deri këtu”.

Në fund, Kompany u shpreh i vendosur: duke luajtur në shtëpi, Bayerni do të bëjë gjithçka për të siguruar fitoren dhe për të hedhur një hap drejt finales së madhe.