Një ngjarje e pazakontë ka ndodhur në futbollin turk, ku Gençlerbirliği ka marrë një vendim që rrallë shihet në botën e sportit.

Klubi nga liga e parë turke ka shkarkuar për herë të dytë brenda të njëjtit sezon trajnerin Volkan Demirel, duke hyrë kështu në histori për një precedent të pazakontë.

“Mandati” i parë i Demirel nisi në tetor dhe përfundoi në dhjetor 2025, ku në gjashtë ndeshje ai nuk arriti të regjistrojë asnjë fitore, duke marrë vetëm tre barazime dhe duke pësuar tre humbje.

Megjithatë, drejtuesit e klubit vendosën t’i japin një mundësi të dytë, duke e rikthyer sërish në stol – një vendim që nuk dha rezultatet e pritura.

Në rikthimin e tij, skuadra zhvilloi nëntë ndeshje, duke siguruar vetëm dy fitore, një barazim dhe duke pësuar gjashtë humbje, çka çoi në një tjetër shkarkim të pashmangshëm.

Me këtë episod, Demirel bëhet trajneri i parë në historinë e futbollit turk që shkarkohet dy herë nga i njëjti klub brenda një sezoni, pa qenë pjesë e ekipit që nga fillimi i kampionatit.

Statistikat tregojnë një përmirësim të lehtë në mandatin e dytë, me një mesatare prej 0.78 pikësh për ndeshje, krahasuar me 0.5 në periudhën e parë, por kjo nuk mjaftoi për të bindur drejtuesit.

Pavarësisht këtij episodi të pazakontë në karrierën e tij si trajner, Demirel mbetet një figurë e respektuar në futbollin turk për kontributin e tij si lojtar.

Ai ka regjistruar 63 paraqitje me kombëtaren e Turqisë dhe ka kaluar pjesën më të madhe të karrierës së tij me Fenerbahçe, ku ishte një nga portierët më të njohur të brezit të tij.

Ky rast mbetet një shembull i qartë i presionit të madh në futbollin modern, ku rezultatet shpesh diktojnë vendime të menjëhershme dhe jo gjithmonë të zakonshme.