Superpërballja e shumëpritur mes Anthony Joshua-s dhe Tyson Fury-t në ‘Wembley Stadium’ raportohet se është vënë në rrezik, pasi këngëtarja e njohur Dua Lipa ka refuzuar një ofertë për të performuar në event.

Sipas medieve britanike, përfshirë raportimet e BBC-së, prania e saj në mbrëmjen e madhe të boksit ishte një nga kushtet e vendosura nga organizatorët për spektaklin, duke ngritur pikëpyetje mbi zhvillimin e tij të plotë.

Dy rivalët britanikë kishin nënshkruar së fundmi për t’u përballur pas vitesh pritjeje, me një duel që konsiderohet ndër më të mëdhenjtë në historinë e boksit modern. Joshua fillimisht pritet të duelojë më 25 korrik ndaj Kristian Prengës, përpara se të përballet me Fury-n në fund të vitit.

Promotori i Joshua-s, Eddie Hearn, theksoi se kërkesa për performancën e Dua Lipës nuk vjen nga boksierët apo ekipet e tyre, por është pjesë e diskutimeve organizative që lidhen me eventin dhe platformën transmetuese.

Në sfond, rivaliteti mes Joshua-s dhe Fury-t ka një histori të gjatë dështimesh për t’u finalizuar, përfshirë anulimin e marrëveshjes në vitin 2021 dhe një tjetër tentativë të pasuksesshme në 2023 për shkak të mosmarrëveshjeve mbi kushtet financiare.

Pavarësisht pengesave të reja, palët ende shpresojnë që “Beteja e Britanisë” të realizohet, në atë që do të ishte një nga duelet më të mëdha të dekadës në sportin e boksit.