Barcelona po përgatitet për një merkato verore të rëndësishme, me synimin për të ndërtuar një skuadër që synon seriozisht UEFA Champions League. Drejtuesit e klubit katalanas kanë identifikuar disa lëvizje kyçe në dalje për të financuar afrimet e mëdha në hyrje.

Sipas planit të drejtuesve, dy emra kryesorë që mund të sjellin të ardhura të rëndësishme janë Alejandro Balde dhe Jules Koundé. Mbrojtësi spanjoll ka humbur terren në hierarkinë e trajnerit Hansi Flick dhe ka tërhequr interes nga Manchester United, ndërsa Koundé do të largohej vetëm në rast të një oferte shumë të lartë.

Në krahun e daljeve, klubi po punon ngushtë me agjentin e njohur Jorge Mendes për të menaxhuar disa situata kontraktuale dhe për të përmbushur kërkesat e fair-play-t financiar. Një tjetër emër që mund të largohet është Marc Casadó, i cili nuk bën pjesë në planet teknike të ekipit.

Barcelona synon që këto operacione t’i finalizojë para muajit qershor, në mënyrë që të ketë hapësirë financiare për goditje të mëdha në merkato.

Në listën e dëshirave të klubit katalanas spikasin disa emra të mëdhenj. Një prej objektivave kryesorë për mbrojtjen është Alessandro Bastoni, për të cilin Interi kërkon rreth 70–80 milionë euro. Në sulm, një tjetër emër i rëndësishëm është Julián Álvarez, aktualisht tek Atlético Madrid.

Megjithatë, nëse shitjet e planifikuara nuk realizohen, Barcelona mund të detyrohet të aktivizojë alternativa të tjera, përfshirë edhe largime të rëndësishme si Raphinha apo Fermín López, të cilët kanë interesim nga Premier League dhe Arabia Saudite.

E ardhmja e merkatos blaugrana mbetet e hapur, por objektivi është i qartë: ndërtimi i një skuadre konkurruese për trofetë më të mëdhenj të futbollit europian.