Cristiano Ronaldo ka reaguar ashpër ndaj kritikave të fundit që pretendojnë se Al-Nassr po favorizohet nga gjyqtarët në kampionat.

Ylli portugez nuk i ka kursyer fjalët, duke e cilësuar situatën si të dëmshme për imazhin e futbollit.

Skuadra e tij arriti një fitore të rëndësishme 2-0 ndaj Al Ahli, duke forcuar pozitat në krye të renditjes në Saudi Pro League. Megjithatë, polemikat nuk munguan, pasi mbrojtësi Merih Demiral deklaroi se liga po e favorizon vazhdimisht Al-Nassrin.

Ronaldo u shpreh i pakënaqur me këto akuza, duke theksuar se po krijohet një klimë negative rreth kampionatit.

“Mendoj se kjo nuk është e mirë për ligën. Të gjithë ankohen dhe e bëjnë më të madhe sesa duhet. Është futboll, nuk është luftë”, deklaroi ai.

Sulmuesi portugez shtoi se është e nevojshme që lojtarët dhe klubet të tregojnë më shumë përgjegjësi, duke shmangur ankesat publike dhe tensionet e panevojshme.

Ai paralajmëroi se do të flasë më gjerësisht për këtë çështje në fund të sezonit, pasi sipas tij ka shumë gjëra që nuk po funksionojnë si duhet.

“Duhet të japim shembull, jo vetëm këtu, por edhe për Evropën. Ne duam të garojmë për të qenë një nga ligat më të mira në botë. Duhet ta analizojmë këtë situatë dhe ta ndalim, sepse për mua kjo nuk është futboll”, përfundoi Ronaldo.

Nëse Al-Nassr arrin të fitojë dy ndeshjet e ardhshme, skuadra e drejtuar nga Ronaldo do të sigurojë matematikisht titullin kampion, duke vulosur një sezon dominues në Arabinë Saudite.