Lionel Messi ka tronditur botën e futbollit me vendimin e tij të ri jashtë fushës. ‘Ylli’ argjentinas ka njoftuar blerjen e UE Cornellà, një klub që militon në Tercera RFEF dhe që synon ngjitjen në kategoritë më të larta përmes “play-off”-eve të promovimit.

Lajmi u përhap me shpejtësi dhe shkaktoi një valë të madhe surprize. Brenda vetëm 24 orësh, klubi shumëfishoi ndjekësit në rrjetet sociale dhe mori vëmendje të madhe mediatike nga gazetarë ndërkombëtarë, duke treguar menjëherë ndikimin global të Messit.

Kontroll gradual i klubit

Ideja e Messit është që të marrë gradualisht drejtimin e klubit pa ndryshime të menjëhershme. Prioriteti i parë është ruajtja e stafit aktual, ndërsa me kalimin e kohës pritet të sjellë njerëz të besuar në pozicione kyçe dhe të rrisë profesionalizimin e gjithë strukturës.

Fokus te akademia

Një nga shtyllat kryesore të projektit do të jetë futbolli i moshave. Messi e sheh akademinë si një pikë të fortë të klubit dhe synon ta zhvillojë më tej, duke krijuar talente të reja për të ardhmen. Ai ka qenë më herët i përfshirë në projekte të tilla, përfshirë edhe organizimin e “Messi Cup”.

Rritje graduale

Sipas planit, zhvillimi i akademisë do të ndikojë edhe te ekipi i parë, por pa presion të menjëhershëm për rezultate të mëdha. Qëllimi është një rritje natyrale e klubit, ndërsa Messi do të sigurojë mbështetjen financiare për të mbajtur projektin.

Aktualisht, ai është i lidhur me Inter Miamin dhe nuk mund të jetë çdo ditë i pranishëm në klub, por do ta ndjekë nga afër dhe do të udhëtojë sa herë të ketë mundësi.

Entuziazëm në skuadër

Në kampin e Cornellà-s, lajmi është pritur me entuziazëm të madh. Lojtarët dhe stafi teknik janë shprehur të habitur, por të motivuar, duke e parë ardhjen e Messit si një shtysë të madhe për pjesën e mbetur të sezonit dhe për objektivin e ngjitjes në kategori më të lartë.