Situata te Real Madridi është gjithnjë e më e tensionuar pas një sezoni zhgënjyes, që ka vënë në pikëpyetje të ardhmen e trajnerit Álvaro Arbeloa. “Los Blancos” janë eliminuar nga Champions League dhe Kupa e Mbretit, ndërsa kanë humbur finalen e Superkupës së Spanjës ndaj Barcelonës. Edhe në La Liga, skuadra duket jashtë garës për titullin, duke pritur vetëm konfirmimin matematikor.

Pavarësisht se Arbeloa mori drejtimin e ekipit gjatë sezonit, pozitat e tij janë të lëkundura dhe presidenti Florentino Pérez po shqyrton ndryshime të mundshme në pankinë.

Në këtë situatë, rikthehet në skenë emri i José Mourinho, një figurë që gjithmonë tërheq vëmendje kur lidhet me Realin. Sipas raportimeve nga eksperti i merkatos Fabrizio Romano, aktualisht nuk ka negociata konkrete mes palëve, por ekziston një dëshirë nga ana e trajnerit portugez për t’u rikthyer në Madrid.

Mourinho, i cili aktualisht drejton Benfica-n, e njeh mirë ambientin madrilen, pasi ka qenë trajner i Realit nga viti 2010 deri në 2013, periudhë gjatë së cilës fitoi një kampionat, një Kupë të Mbretit dhe një Superkupë.

Megjithatë, për momentin gjithçka mbetet në kuadrin e spekulimeve. Nuk ka pasur kontakte konkrete mes klubit dhe trajnerit, ndërsa drejtuesit madrilenë vazhdojnë të analizojnë situatën për të vendosur mbi të ardhmen e pankinës.