Premier League ka siguruar një vend të pestë për sezonin e ardhshëm të UEFA Champions League, falë performancave të shkëlqyera të klubeve të saj në kompeticionet europiane këtë sezon.

Ky vend shtesë u konfirmua pas fitores 1-0 të Arsenal ndaj Sportingut të Lisbonës në ndeshjen e parë të çerekfinaleve të Champions League, duke siguruar që Anglia do të përfundojë ndër dy ligat kryesore sipas renditjes së koeficientit UEFA.

Kjo është hera e dytë radhazi që Premier League fiton një vend shtesë, duke bërë që këtë sezon Liverpooli, Arsenali, Manchester City, Chelsea dhe Newcastle të marrin pjesë në Champions League, ndërsa Tottenhami u kualifikua si një ekip i gjashtë pas triumfit në Europa League.

Garë e hapur për vendin e pestë

Aktualisht, Liverpool mban vendin e pestë me 49 pikë, vetëm një më shumë se Chelsea në vendin e gjashtë, ndërsa Brentfordi dhe Evertoni janë vetëm tri pikë pas tyre. Në fakt, vetëm shtatë pikë i ndajnë ekipet nga vendi i pestë deri te i 13-ti, duke bërë garën jashtëzakonisht të hapur.

Ekziston gjithashtu mundësia që Anglia të ketë edhe më shumë përfaqësim në Champions League sezonin e ardhshëm. Nëse Aston Villa, aktualisht në vendin e katërt, fiton Europa League-n, por përfundon jashtë katër vendeve të para, ajo do të kualifikohet automatikisht, duke çuar numrin e ekipeve angleze në gjashtë. E njëjta gjë mund të ndodhë me Liverpoolin, nëse fiton Champions League dhe përfundon jashtë katër vendeve të para.

Përveç kësaj, Nottingham Forest nëse fiton Europa League, do të siguronte gjithashtu pjesëmarrjen në Champions League, pavarësisht pozicionit të tij aktual në ligë, që është në vendin 16.

Edhe Spanja favorizohet për vendin e dytë të pestë në Champions

Ndërkohë që Premier League ka siguruar një vend EPS, gara për vendin e dytë vazhdon. Aktualisht, LaLiga e Spanjës është në ‘pole position’ përballë Gjermanisë dhe Portugalisë, por rezultatet në fazat përfundimtare të kompeticioneve europiane mund të ndryshojnë renditjen.

Nëse Spanja mban këtë pozicion, skenari do të përsëritet si sezonin e kaluar, ku Premier League dhe LaLiga do të marrin dy vendet shtesë për Champions League.