Mbrojtësi i Interit, Alessandro Bastoni, duket i vendosur ta lidhë të ardhmen e tij me klubin zikaltër edhe për shumë vite. Sipas raportimeve nga Italia, qendërmbrojtësi italian synon të rinovojë kontratën me Interin deri në vitin 2030, duke refuzuar interesimin e disa prej klubeve më të mëdha europiane.

Gjatë verës së kaluar, Bastoni ishte në radarët e gjigantëve si Barcelona dhe Manchester United, por mbrojtësi duket se nuk është tunduar nga ofertat e tyre. Përkundrazi, ai dëshiron të vazhdojë karrierën në Milano dhe të bëhet një nga figurat simbol të skuadrës.

Sipas mediave italiane, bisedimet mes palëve për zgjatjen e kontratës kanë hyrë tashmë në një fazë konkrete. Drejtuesit e Interit duan ta sigurojnë sa më shpejt qëndrimin e mbrojtësit, duke e konsideruar atë një nga elementët më të rëndësishëm të projektit teknik të trajnerit Cristian Chivu.

Qëllimi i klubit është të “blindojë” një nga lojtarët më të vlefshëm të skuadrës përpara hapjes së merkatos së verës, në mënyrë që të shmangë çdo mundësi ankandi mes klubeve të mëdha europiane.

Në këtë mënyrë, rinovimi i mundshëm deri në vitin 2030 do ta kthente Bastonin në një nga shtyllat kryesore të Interit për vitet e ardhshme dhe në një nga liderët e projektit afatgjatë të klubit zikaltër.