Varvara Voronchikhina shkroi një faqe të re historie për Rusinë në Paralympic Winter Games. Skiatorja 23-vjeçare fitoi medaljen e artë në garën e Super-G në Cortina d’Ampezzo, duke bërë që himni rus të luhej për herë të parë në 12 vitet e fundit në një event paralimpik dimëror me flamurin e vendit të saj.

Voronchikhina mposhti francezen Aurelie Richard, fituese e medaljes së argjendtë, me një diferencë prej 1,96 sekondash në pistën Olympia delle Tofane, duke i dhënë Rusisë podiumin e parë të artë në Lojërat Paralimpike të Dimrit që nga viti 2014.

Ministri rus i Sportit, Mikhail Degtyarev, përgëzoi skiatoren përmes Telegram-it: “Urime Varvara Voronchikhina për medaljen e artë të parë të Rusisë në Super-G në Paralimpiket e Milanos-Cortina. Himni rus po luhet!”

Pjesëmarrja e Rusisë këtë vit vjen pas një periudhe të gjatë ndalimi. Pas skandalit të dopingut, Rusia nuk mori pjesë në Lojërat Paralimpike të 2018 dhe së bashku me Bjellorusinë u ndaluan në 2022. Ky vit shënon rikthimin e gjashtë atletëve rusë dhe katër bjellorusë që konkurrojnë për vendet e tyre me flamujt kombëtarë.

Voronchikhina kujtoi edhe mungesën e saj të detyruar në Pekin 2022: “Katër vjet më parë isha gati të garoja, por Rusia u pezullua nga CPI. Ishte shumë e trishtë për mua. Sot shpresoj që gjithçka të shkojë më mirë dhe kështu ndodhi.”

Megjithatë, fitorja shkaktoi reagime nga Ukraina, që akuzon ekipin rus për praninë e mbështetësve të Putin-it dhe ish-ushtarëve, përfshirë edhe Voronchikhinën, e cila kishte marrë një çmim nga Presidenti rus në 2022.